(الفصل التاسع عشر )
><بيت ابو سعود><
صحت هنادي متروعه من نومها على صوت شي طاح بالارض برى غرفتها
وقفت بسرعه وعدلت بيجامتها الصفراء وطلعت وهي مصدعه تبي النوم ..شافت امها واقفه ويدها على قلبها وقطع الكاس بالارض
قالت هنادي وهي تمشي بسرعه لامها وتبعد عن القزاز المتكسر :-خليه يمه انا انظفه
ناظرت بامها وشافت وجهها ما ينتفسر مسكتها مع يدها وقالت بخوف :-يمه فيه شي
قالت امها وهي تحس بنغزات في قلبها :-هاه...لا بس قلبي يعورني
خافت هنادي وقالت :-خير ان شاء الله
لكن امها كانت النفسيه تعبانه لسبب ما ؟؟
قالت هنادي :-يمه استريحي لاتكبرين الموضوع
قالت امها والالم بصدرها يزيد :-يمه قلبي مو متطمن ياويل حالي عيالي كل واحد بديره ولا ادري عنه
ضاق خلق هنادي وبدا الخوف يشتغل معها قالت بهدوء ماتحس به :-يمه لاتفاولين عليهم سلطان بسكن طلاب وانتي عارفته مو راعي خرابيط وهمه دراسته حتى انه مستعجل يبي يخلصها عشان يرجع ويتزوج وفهد مع مرته بالشرقيه ولو صاير له شي لاسمح الله بتدق علينا ماتعرف احد هناك وسعاد مع رجلها وسعود هنا
جلست امها بصعوبه :-لا لا قلبي يعورني ماراح اتطمن لين تدقين عليهم
جلست هنادي جنبها :-يمه نخوفهم على الفاضي انتي تعرفين العيال والله لو تقولين انك بتتطمنين ليجون ماعليهم منك
قالت امها وملامحها تعبانه :-اجل دقي على اختك
طلعت عيونها قدام :-مستحيل اكلمها الحين رجلها عندها
امها :-طيب وش السواة قلبي مو متطمن
هنادي وهي تجلس امها :-اذكري الله يمه هذي وساوس شيطان
امها :-لا الله الا الله محمد رسول الله ذاكرته يمه فكل وقت وفكل حين
هنادي وهي تحب على راسها :-اجل لا تكبرين السالفه وتتعبين نفسك بسبب اوهام ..
>
<
>
<
>>>>>>>>>بالمستشفى
قال الطبيب دقوا على اهل هالمرضى لازم يتلقون نبأ وفاتهم
هزت الممرضه راسها :-اوكي
وراح يكمل باقي تعليماته للممرضه ...
بعد ربع ساعه دخل طلال المستشفى بسرعه ...
طلال :-اخوي بغيت اسال عن مريض ومريضه دخلوا قبل ساعه المستشفى
الموظف :-اسماءهم
طلال :-احمد بن نايف وسعاد بنت ناصر
الموظف :-تفضل هذا رقم غرفة احمد بن نايف
طلال تغير لون وجهه :-وسعاد
الموظف بارتباك :-يفضل تراجعون الطبيب المسئول
وقف طلال شوي يجمع افكاره ويتماسك باين الرد من تصريفة الموظف ...
وراح لغرفة اخوه وهو مايدري وش يقول له وهو بالطريق طلع جواله ...
ودق على جوال سعود
>
<
تقلب سعود بفراشه وصوت الجوال مزعجه ..
مد يده واخذ جواله ... لينه رقم طلال
قال وهو يرجع شعره بيده ..بهمس قبل لايرد :-خير اللهم اجعله خير
"الو"
طلال :-هلا سعود كيف حالك
سعود :-بخير خير ان شاء الله
طلال :-خير خير
سعود :-طلال وش فيه مكالمتك هالحزه فيها شي
قال طلال :-احمد وسعاد صار لهم حادث وهم بمستشفى -----------
قام سعود بسرعه :-افااااااااا صار لهم شي
تردد طلال :-مـ مدري توني واصل المستشفى اخويا احمد هم الي داقين علي وعلموني الحقه بالمستشفى
بسرعه البرق لبس سعود ثوبه واخذ شماغه بيده قامت الماس وهي تناظر وجهه
وقفت :-سعود فيه شي
ناظرها وقال :-لا ارجعي نامي
خافت الماس موت :-سعود تكفى قلي شفيه
اخذ مفاتيحه وجواله وقال وهو معطيها ظهره :-واحد من ربعي صار له حادث وبروح له
صدقته :-لاحول ولاقوة الابالله الله يرفع عنه كل ضرر وسوء
طلع بسرعه من الجناح ...
في طريقه شاف امه جالسه مهمومه وهنادي معها وجهها ماينتفسر ,,
استغرب من معلمهم ..
مر من عندهن بسرعه ماله خلق مناحه وهو توه مايدري وش السالفه ولا وش كثر اصاباتهم ..
وقفت امه :-يمه من ...
ارتبك سعود :-من الي من يمه
امه :-من من اخوانك الي تعبان
سعود :-محد يمه محد
امه ودمعتها تفر من عينها :-قلبي يقول لي اني بفقد احد منكم
دمعت عيونه ومافات هالشي هنادي الي بكت غصب وقالت وهي ماسكته :-منهو ياسعود من
نفض سعود يدها ونزل بسرعه دقايق الا وطاحت امه على هنادي ...
صرخت هنادي يمه ...
الا بجية ابوها ومنال :-خير شفيك...............
ركضت منال وطاحت عند امها الي بحضن هنادي :-يمه بسم الله عليك هنادي شفيه
ابوها وهو يساعد البنات يصحن امهن :-علام امك شفيه صاير شي لاخوانك
قالت هنادي وهي تصيح :-مدري امي قلبها يعورها وموسوسه على اخواني وفجاه طلع سعود يركض وشماغه بيده
انصدم ابوها وقلبه عوره :-طلع يركض
قالت وهي تبكي وكلامها يالله ينفهم :-ايه طلع ركض ولما سألناه اذا اخواني صابهم شي دمعت عيونه وماتكلم
صحت ام سعود وقالت ودموعها تسيل :-يمه دقي على اخوك خليه يعلمني من
وقفت هنادي تمسح دموعها بقفا يدها وركضت لغرفتها تجيب جوالها ...
كان سعود قافل جواله ...
انهارت على السرير ودرت ان فيه شي ...
نزلت راسها ومسكته بيدينها وهي تبكي وترجف خوف وترقب من من !
سلطان الي ببلاد الغربـــــــــــــــــــه والي يترقب اليوم الي يرجع فيه عشان يتزوج قمر
فهد الي توه متزوج وما تهنى بزواجه
سعاد الي اخيرا قدرت تحل مشاكلها وتو تبدا حياة جديده مع زوجها الي تعشقه
دخلت منال عليها الغرفه ونفسيتها دمار ..قالت وهي تمسح دموعها بعناد :-هنادي لاتفاولين خير ان شاء الله
قالت تهمس وهي على حالتها :-قلبي يعورني انا بعد
جلست منال جنبها وقالت وهي تمسح دموعها في كل مره :-هنادي امي الي فيها يكفيها السكر عندها 500 ميه وابوي جالس يحاول يكلم سعود
هنادي :-قافل جواله وهذا دليل ان فيه مصيبه
بلاشعور طلعت بكية منال قويه :-ياويلي
ضمتها هنادي وجلسن على هالحاله !
×
×
×
>>>>>>>>دخل سعود المستشفى ويده على قلبه
وقف عند مكتب الاستقبال
سعود :-لو سمحت اخوي بغيت اسال عن رجال وزوجته دخلوا بسبب حادث قبل ساعه عندكم
الموظف :-الاسم
سعود :-سعاد بنت ناصر واحمد بن نايف
الموظف وهو يطقطق في الكومبيوتر :-الاخ احمد بن نايف في الغرفه رقم 530
قال بخوف :-وسعاد
تردد الموظف وقال :-يفضل مراجعة الطبيب المسؤول
انخرش قلبه :-من الطبيب وش اسمه
الموظف :-الطبيب \ مشاري
ومشى سعود بسرعه لغرفة احمد ...
كان طلال واقف في هاللحظه وشكله متضايق .. انقبض قلب سعود
سعود :-طلال خير
التفت يمه طلال :-هلا سعود
سعود :-طلال علمني احمد وزوجته فيهم شي وش الي صار انت قلت لي حادث بدون شرح
طلال :-بيتهم احترق والظاهر السبب التماس .. شكل المويه متسربه لطبلون الكهربا
ارتجفت انفاس سعود :-طيب
طلال :-احمـــــــــــــــد مغمى عليه للان شكله جايه انهيار عصبي و...............
سعود :-واختي !
طلال بتردد :-والله مدري شقولك
سعود عصب من المماطل عصب من الخوف ومن الهواجس :-قول شفيها
رحم حاله طلال وقال :-سعاد راحت في غيبوبه
انهار سعود على كراسي الانتظار :-غيبوبه
طلال بحزن :-والعلم عند الله يمكن تصحى ويمكن لا
صرخ من قلبه لكن صرخته اختنقت وصارت همس :-لااااااااااا
جلس طلال جنبه وحط يده على كتفه :-الحمد لله انها ما ماتت
قال سعود بخدر :-كيف ما ماتت طلال اغلب الي يروحون بغيبوبه مايصحون منها ابد
سكت طلال لان كلام سعود مضبوط واصلا هذا الي قاله له الطبيب ...
تردد طلال وقال :-سعود فيه شي ثاني
رفع سعود نظراته الغايمه لولد عمه وقال بصوت متحشرج :-آآآآخ قول ياولد عمي ماعاد ورى الي سمعته
طلال :-سعاد كانت حامل
رفع نظره وقال :-كانت
طلال :-ايه علمني الطبيب انها اجهضت هو صح شرح لي الاسباب بس كلها طبيه ومافهمت منه شي
سعود :---------
وقف سعود ووقف طلال معه :-وين
قال سعود والكون حوله اسود انعدمت الوانه وماتت بهجته :-بشوف اختي
طلال حاول يمنعه بس سعود ماعبره ...
مشى سعود لغرفة الطبيب المسؤول عن سعاد
وبعد دقايق لقى مكتب الطبيب ومن حسن حظه ان الطبيب كان موجوده فيه
سعود وهو يدق الباب ..
الطبيب :-تفضل
دخل سعود :-السلام عليكم
الطبيب :-وعليكم السلام استريح اخوي
جلس سعود وقال :-حبيت اسال عن مريضه دخلت عندكم قبل تقريبا ساعتين الا شوي
الطبيب :-وش اسمها
سعود بغصه :-سعاد بنت ناصر
فتح الطبيب ملفات قدامه وقال وهو يسكر ملف قرا فيه شوي :-المريضه سعاد للاسف راحت في غيبوبه
قال سعود والدموع بعيونه :-دكتور لا تكون موته دماغيه
تغير وجه الطبيب وقال بهدوء :-لا ما ماتت دماغيا بس الامل واهي
لاول مره يتمنى سعود انه يبكي ..
بس تنزل دمعه وحده .. لكن حتى الدموع صارت عصيه وتمردت عليه ومانزلـــــــــــت مو قادر يستوعب الي يسمعه او بالاحرى مو قادر يصدق ويستوعب حس زي شي ينهش فيه يألمه ومايقدر يمنعه .. شاف بعيونه شباب اخته يضيع قدامه .. شاف انهيار ولد عمه ورفيق عمره وهو يشوف زوجته تموت قدامه تدريجيا بلا حول وقوه ..
قال الطبيب يواسيه :-(ولاتقنطوا من رحمة الله)
هز سعود راسه ومارد عليه ...
كمل الطبيب :-بالنسبه لاحمد اظنه زوج المريضه ولا
هز سعود راسه ومارد .. ضاع الكلام وماتت الحروف مابقي الا الالم .. السواد .. وفجيعه هزته في الروح هزه تفوق الوصف!
الطبيب :-اقدر اقول الا الحمد لله لان ما صابه ضرر من الحريق غير شوية حروق بسيطه متفرقه
بلع سعود غصته الي جرحته تجريح :-والانهيار
الطبيب :-الانهيار بسبب خوفه على زوجته اتوقع او بسبب صدمته من كل الاحداث الي مرت انا الي قالوه لي المسعفين ان قلب المريضه توقف وفي هاللحظه اغمى عليه وانهار اتوقع انه حسبها توفت ... طبعا المسعفين ماقصروا وصدموها بالشحنات الكهربائيه وقدروا بقدرة الله يمنعون وفاتها لكن للاسف ان الجنين الي كانت حامل فيه مات بسبب تسمم دم امه بالغازات القاتله الي نتجت بسبب تنفسها الحريق للاسف ياخوي الاضرار الي لحقت بالجهاز التنفسي وبالتالي بدم الام خطيره جدا وانا من الحين اقولك لا تتامل كثير
قال سعود بحزن ماله مثيل :-الله كريم
وقف الطبيب وقال :-ان الله اذا احب قوما ابتلاهم
سعود بحزن وهو يهز راسه :-ونعم بالله
ووقــــــــــــــــف وطلع من غرفة الطبيب وحالته حاله
ياشينها من فجيعه كيف بيعلم ابوه وامه واخواته و الاهم احمد كيف بيبلغونه بالي صار لزوجته وانها يمكن تكون النهايه
طلع سعود يجر رجوله جر..قابله طلال الخوف باين عليه قال بلهفه :-هاه بشر
قال سعود وصوته متغير :-وش ابشرك به أختي راحت من يدينا
تغير صوت طلال وقال من قلب :-لاحول ولاقوة الا بالله الك ماقبلناه يا شيخ
سأله سعود وقلبه يتقطع :-شخبار احمـــــــــــــــــــد
طلال :-لسى ماصحـــــــــى ومتوقعين مايصحى الا بكره
كمل طلال وهو يناظر في ساعته :-يالله ياسعود الساعه على وشك تجي ثلاث الفجر خلنا نروح نريح وبكره من بدري نرجع
سعود ماكان له حيل يرفض او يتعرض :-خير ان شاء الله
وطلعوا من المستشفى !
كلن شايل همه بقلبه وكلن طلع مكسور الخاطر فاقد الامل
عند بوابة المستشفى >>
قال طلال وهو يعدل شماغه :-يالله اشوفك ان شاء الله على خير
قال سعود بضيق :-ان شاء الله
طلال:-سلام
سعود :-مع السلامه
ركب سعود سيارته ودموعه على وشك تنزل الي صار كوم والموقف الي بينحط فيه لا رجع البيت وقابل نظرات اهله الخايفه كوم ثاني ... شغل سيارته وراح لقدره المكتوب وهو يحس بقلبه ثـــــــقيل حيل *
>>في بيت ابو سعود
كانت الحاله حاله وابو سعود بدى يوسوس دق على سعود ومافيه امل لانه مايردعليهم..اما ام سعود كانت بغرفتها والبنات عندها جالسات ..
طلعت هنادي من الغرفه وهي مو متحمله اسئلة امها الي تقطع قلبها
نزلت تحت لين ابوها جالس وباين عليه انه مهموم جلست هنادي جنبه
قال بتعب :-مادق اخوك
هنادي :0-لا مادق
كملت وهي تشوف ملامحه كئيبه :-روق اعصابك يبه خير ان شاء الله
هز راسه وماتلكم الا وباب المدخل يفتح ويدخل سعود وقفوا كلهم وراحوا له ...
كانت هنادي تحس ببروده تمشي في دمها عجبيه كانها انسان محكوم عليه بالاعدام وجايين ياخذونه عشان بينفذون فيه الحكم
لاول مره يتمنى سعود يكون في مكان غير مكانه الحين لانه مايحب ينقل اخبار شينه لاحد وخصوصا اذا كانت الاخبار عن اعز شخصين على قلبه
أحمـــــــــــــــــد & سعـــــــــــاد
ولد عمه ورفيق دربه
واخته حبيبة قلبه...
اخته العنيده الي راسها يابسه ، اخته الي لانوت على شي محد يقدر عليها ، اخته الي كانت له عون الي وقفت جنبه في محنته وماقصرت عنه بشي ، اخته الي كانت نوارة بيتهم .. اخته الي من احب خلق الله على قلبه!
واخته الي ضاع شبابها اليوم !!
ورمش بعيونه عشان ماتطيح دمعته .. مجرد انه بيعلمهم بالخبر يألم كفايه!
قالت هنادي وهي تركض له :-بشر سعود وش فيه اكيد اكيد مافيه شي
غص بعبرته وطاحت عيونه بعيون ابوه الي كان جالس ويناظره بحزن وكانه عرف انه فيه شي ماهو سار و ان احساس امهم بمحله
ناظرته هنادي وهو يناظر ابوه ورجعت ناظرت له ودموعها تملى عيونها لسى عندها امل مايكون فيه شي لسى في خاطرها تدعي الله يكونون اخوانها بخير ، لكن ملامح اخوها الكبير كانت تعبر عن الف كلمه ...
ماقدرت تكتم اكثر وطلعت صيحتها متقطعه وهي حاطه يدينها الثنتين على فمها عشان ماتصارخ وتفقد السيطره على نفسها
راح سعود يمشي للمكان الي ابوه جالس فيه
بدون مقدمات قال ابوه :-من!
نزل سعود راسه :-سعاد اختي صار لها حادث وهي بغيبوبه الحين
صرخت هنادي :-لاااااااااااااااااااااااااااااا
راح لها سعود بسرعه ومسكها مع يدها وقال بهمس :-امي مو ناقصه لاتزيدن عليها
لكن هنادي جلست تبكي ...
قال سعود لابوه الي متغير لون وجهه :-يبه قل انت لامي انا مو قادر اعلمها اخاف عليها هز ابوه راسه ...
طلع ابوه فوق وجلس سعود تحت وهو مو قادر يتحرك من مكانه جلست هنادي جنبه وهي تبكي :-سـ..سعود سعاد بتموت
قال بقوه :-بسم الله عليها لا ان شاء الله
همست :-طيب
قال بحنيه :-هي في غيبوبه بين يدين الله ادعيلها
وجلست تبكي ..ضمها سعود وجلست تبكي على صدره ..
وقفت نوف وهي تشوف هنادي تبكي على صدر سعود ..ناظرها سعود
جت لهم بسرعه وقالت بخوف :-شفيه شصاير
قال سعود :-سعاد واحمد صار لهم حادث
انصــــــــــــدمت
قالت هنادي بكره :-لاتسوين فيها متاثره كلنا نعرف انك ماتحبين اخوانك
قال سعود بهمس :-هنادي
كملت وهي تحس بتعصيب وحزن ماله مثيل :-انت ماتعرفها هذي انسانه منافقه معدومة احساس
سالت دموع نوف ومسحتها عنهم بسرعه لكنها مافاتت سعود ..
صرخ بقوه :-هنادي
قالت هنادي وهي تحقرها :-بروح لامي اصرف
ومرت من عند نوف وبدون اهتمام صدمتها بكتفها وكملت طريقها ...طلعت نوف بسرعه غرفتها ناداها سعود لكنها ما ردت عليه ...
دخلت نوف جناحها ودموعها تسيل .. شكلها شوهت سمعتها بما فيه الكفايه ، هي ما بكت من كلام هنادي هي بكت لان هذا كان واقعها قبل لاتعقل وتهجد ..
جلست على سريرها وهي تسترجع ذكرياتها مع اخوانها ...تذكرت كل المصايب الي سوتها فيهم والمصايب الي كانت السبب فيها ...
لانها تعرف امها ماتحب الي يتحداها .. وكانت تنفعل عليهم وتأذيهم بشكل ماينوصف
حرق احمد وناصر
ورنـــــــــــــــــا
اخ رنا !!
اختها الحبيبه .. اختها الي على عكسها الكل يحبها ويذكرها بالخير
اختها الي حتى ملكتها ما حضرتها هي وامها
تجهيزات زواجها ما تكرمن وساعدنها فيها...
خسرت اعظم اخت بغرورها وانانيتها وصارت وحيده الحين بهالدنيا ...لا اخوان يحبونها ولا ابو ولا ام حتى ، حتى زوجها مايبيها ومبقيها تحت ذمته عشان بس مايلحقها كلام الناس بسوء
×
×
>>>>>>>في جناح ابو سعود
قالت امـ سعود بهمس :-بنيتي صاير لها حادث
قال ابو سعود :-ايه وهي واحمد بالمستشفى وبخير مافيهم الا العافيه بس بيجلسون اليوم تحت المراقبه لانهم يخافون عليهم لايكونون تنفسوا كربون واجد
طبعا ام سعود ماتفهم في الطب بشي عشان كذا نوعآ ما مشت عليها الكذبه
ناظرت في زوجها وقالت بخوف :-ناصر اذا في سعاد شي علمني
ناظرها بنظراته الي كالعاده وقال :-شفيك يامره قلت لك بخير وبكره نروح نشوفها
ام سعود :-طيب
وجلست تمسح دمعاتها بجلالها ..
قال ابو سعود وهو يحس بضيق :-خلاص يا ام سعود قومي صلي لك ركعتين والله يستر
وقفت وراحت تصلي ركعتين تدعي فيهم الله يحفظ بنتها من كل مكروه
:
:
:
دخل سعود جناح نوف لقاها جالسه وتبكي ...
وقفت يوم شافته :-هلا سعود
سعود :-لاتزعلين من هنادي
قالت وهي تمسح دموعها :-انا موزعلانه منها انا زعلانه من نفسي
استغرب سعود
كملت :-كل الي قالته صح من متى كنت احب اخواني كنت طفله خربها الدلع وخربتها تربية امها كنت عكس رنا في كل شي رنا كانوا العيال يحبونها كانوا لاصارت لها مشكله مع امي يتحملون المسؤوليه كلها عنها كانوا يعزونها يغلونها اما انا كنت اكرههم ما طيقهم بتقول مو معقول في بنت ماتحب اخوانها واقول لك ايه فيه انا
سكت سعود وقدر لها صراحتها لو كان لاحقه شك في توبة نوف خلاص الحين تلاشى!
جلس جنبها وقال بحنيه :-(ان الله يقبل توبة العبد مالم يغرغر) يعني مدام الواحد ماجته سكرات الموت خلاص الله سبحانه وتعالي بيقبل توبته شرط تكون توبة نصوح والاخوان مهما جرى بينهم من مشاكل يبقى حبهم لبعض موجود حتى لو ماحسوا فيه انتي ابدي صفحه جديده وحياه جديده وعوضي عن كل الي فات
رفعت نظرها وطاحت عيونها بعيونه ....
وصلـــــــــــــــته الرساله وحبها له كان واضح بعيونها تضايق سعود ماكان وده تصلح حياتها من جهه وتتدمر من جهه لكنه ما يبي يظلمها معه لانه ما يحبها ولا راح يحبه لان الماس هي كل حياته !
وقف بسرعه وقال بهمس :-تصبحين على خير
وقفت معه وقالت بهمس :-سعود
جمد في مكانه ..
وقفت قدامه وقالت بضعف :-مافيه امل تحبني لو سراب امل
ناظر في وجهها ورحم حالها قال بهمس :-انا ما اكرهك يا نوف
قالت بهمس :-انت فاهم قصدي
تضايق وقال :-لا للاسف الماس كل حياتي
وطلع من غرفتها بسرعه ....
راح لجناحه هو والماس لقاها تصلي الفجر ..وطلع مره ثانيه على عشان يروح يصلي في المسجد مع أبوه
×
×
×
بعد الصلاه رجع سعود ...
قالت الماس وهي تناظره :-بشر شخبار صديقك
جلس سعود جنبها وقال بهدوء :-مو صديقي الي رحت له
(لسى مااستوعبت الماس) :-اجل من!
سعود بهدوء اكثر لانه خايف عليها :-سعاد صار لها حادث بسيط ههههههه الخبله طاحت مع الدرج وكسرت رجلها
خافت الماس :-ياقلبي تعورت مره
سعود وهو يدعي ربه ماتكشفه :-لا كسر وارتجاج بسيط بيخلونها عندهم لبكره تحت المراقبه وبعده بتتنوم كم يوم بسبب الكسر الي برجلها
وبسرعه جهز نفسه بينام ..
قالت له :-حبيبي حاسه انك مو على بعضك
شقول لك ..صدمــــــــــة حياتي في اختي هزتني من الاعماق ...
ضيقتي من وضعي انا ونوف ..
والا احمــــــــــــــد الي الله يستر من ردة فعله لا درى عن سعاد !
قال وهو يسكر النور :-تعرفين يوم رحت المستشفى كانت يدي على قلبي من الخوف ويوم رجعت كنت خايف على امي لا يرتفع سكرها والضغط ولا يجيها شي
قالت له :-الحمد لله انها جت على كذا
آه لو تعرفين الحقيقه .. وكله كوم والبيبي الي مات كوم
سعود :-الحمد لله يالله تصبحين على خير
استغربت الماس برود سعود معها مو عوايده ... اكيد فيه شي صاير وكبير لايكون سعاد فيها شي
لا لا بسم الله عليها فعدوينها !
ورجعت غمضت عيونها ومع الافكار الي توديها يمين وشمال نامت
*
*
*
*
*
>>>>>>>>>>>> اليوم الثاني
الساعه 8 صباحآ
بالمستشفى....
فتح احمد عيونه واجهره نور الشمس الي طالع له مع الشباك
للان مو مستوعب شي ..ووينه فيه وليه هو هنا...
وبغمضة عين تذكر كل شي...
نـــــــــــــــــــــــــــــــــــــــار & رعب & الم & خوف
ودقات قلب سعاد تـــــــــــــــوقف....
سعاد ماتت لا لا مستحيل !
طلعت تنهيده منه تقطع القلب ..سعاد ماتت وتركته وحيد
ماتت وخلته هو يتعذب وبدل مايكون الموت موتة وحده ..صار موت في كل لحظه وثانيه ودقيقه !
سالت دموعه غصب عنه ، دموعه العزيزه الي ما نزلت الا مره دموعه الغاليه الي ما تتثمن ..
سيل جارف .. وما يمنعه امنع سد انخلق !
لازم يشوفها لازم والا بيموت بحســـــــــــــــــــرته
ضغط على جرس جنب السرير . وجاه الممرض
قال احمد بملامح روعت الممرض :-امس كانت زوجتي معي يوم جيت هنا تقدر تستفسر عن الموضوع
الممرض :-ان شاء الله دقايق وبرجع
وطلع من الغرفه ...قام احمد وغسل وجهه وتوضا...
وصلى صلاة الفجر الي فاتته وصلاة الضحى....
بعد ماخلص صلاه وقف ورجع جلس وراسه منحني ودموعه يمنعها وتنزل ...
دق الباب الا وبدخلة الممرض الغرفه ناظره احمد بعيون ماتشوف ..
قال الممرض :-زوجتك بالعنايه المركزه
عنايه !
سعاد بالعنايه !
رفع نظره وقال ووجهه كله ذهول :-شقلت!
الممرض :-اقول زوجتك بالعنايه المركزه وهذا رقم الغرفه واذا تبيني ارسل للطبيب المسؤول عنها تامر ثواني ويكون عندك
للآن مو مستوعب لان اقل امل له ... لو طلع سراب بيدمره وبيقضي عليه
قال احمد :-زوجتي عايشه
الممرض :-ايه عايشه بس ...................
ناظره احمد :- بس ايش
مشى الممرض للباب وقال بتوتر :-تدري شلون بروح انادي الطبيب المسؤول عنها واخليه يكلمك ..
كان احمد بيمنعه لكن الممرض طلع بسرعه ..
قلبه مو متمطن ..
لكنه شبه ارتاح على الاقل كل شي اهون من الموت .. من انها تروح وتتركه يعيش وحداني
وقف مو قادر يجلس دقيقه على بعضها ..
لازم يشوفها لازم
تذكر رقم الغرفه الي اعطاه له الممرض ..
وقف وطلع من الغرفه بسرعه ...
بعد عشر دقايق وصل غرفتها ... ودخل عليها كانت شاحبه كلها اجهزه ...التفت لان فيه واحد حط يده على كتفه ...
الطبيب :-انت زوج سعاد
احمد :-ايه
الطبيب :-ياليت لو تتفضل معي المكتب ثواني
مشى احمد معه وكانه يروح لمصير مجهول مايعرف عنه شي ...
بعد خمس دقايق ..
قال الطبيب :-شف يا اخ احمد الظاهر انت ماعندك خبر عن مدى اصابة زوجتك .. وانا اشوفها حكمه من الممرض انه ما قال لك ..
احمد :- ....................
الطبيب :-زوجتك في غيبوبه
احمد ..:_...................
كمل :-للاسف ما نقدر نتامل كثير في نجاتها خل املك بالله كبيره والله يعوضك خير في ولدك الي راح ..
همس :-كانت حامل
الطبيب :-ايه لكن بسبب تنفسها لغازات سامه تسمم حملها ومات الجنين ببطنها
قال احمد وهو يتالم الام ماتنوصف ولا يوصلها شرح :-ابي الحقيقه دكتور مابي اتعشم ويخيب ظني ابي الحقيقه الحقيقه واقع انها بين الحيا والموت مؤلم بما فيه الكفايه
الطبيب :-لا تتامل كثير .. حنا متوقعين تموت بسكته دماغيه في اي لحظه الاكسجين نقص عن جسمها بشكل خطير .. ادع ربك وتصدق لها رمضان مابقي عليه الا ايام معدودات وربك ماينسى احد من عباده ...
هز احمد راسه ...
وطلع من الغرفه ...
دنياي ..دنياك
هو حد يسواك
القلب وياي
والبال وياك
مشى يجر رجوله جر لغرفتها ..
قبل لحظات وقف قدامها وهو متأمل خير يالله كلها كم ساعه وتصحى
والحين يوقف قدامها
وهي يعرف انها تحتضــــــــــــــــر وانها تموت !
ياليت الالم كان مره وانتهى ...
لكن الالم الحين .. عذاب × عذاب × عذاب
دخل غرفتها كانت بتعترض الممرضه لكن الطبيب كان ورى احمد واشر لها تطلع من الغرفـــــــــــــــــه ..
سحب كرسي وجلس جنبها ...
مسك يدها يكلمها ..
(لا تتركيني يالغاليه .. انا بدونك مقدر اعيش .. انا بدونك جسم بدون روح ..عسى الي فيك فيني وفي من يكرهوننا ..احبك وماحبيت غيرك بحياتي ..
قاومي وكافحي اعرفك انتي القويه العنيده الي محدن يقدر عليها ..!
انتي الي جننتيني وهبلتي فيني سنين ..
انتي الي الغاليه انتي قطعه من القلب ... سعاد طلبتك لا تتركيني طلبتك ...
والله لا اموت والله ...)
سالت دموعه .. لا اراديا
كان يعرف انه يموت فيها بس تو يعرف شكثر يحبها
يحبها لدرجه لو كان بيده ما تردد دقيقه وجا فمكانها .. وتحمل الالم والعنا
كان متمسك بيدها بشكل ما ينوصف وكانها بتروح منه لاتركها !
"ربك كريم يا احمد"
احمد :-سعود
سعود :-الحمد لله على سلامتك
احمد :-الله يسلمك
سعود وهو يناظر في اخته الي حبها على جبهتها :-خير ان شاء الله الله يرجعك لنا سالمه يالغاليه
سكت احمد مارد كانت عيونه تسرح على وجهها وعلى شعرها ..
خســـــــــــــــارته عظيمه ومحدن بمقدرها !
قال سعود :-احمد كتبولك خروج قم نطلع
عاند :-اترك سعاد
خنقته الغصه :-ربك معها وجلستك لاتقدم ولاتاخر
احمد :-لا ابي اجلس معها
وماقدر سعود يقنعه ....
واضطر انه يجلس معه لين يقرر متى يرجع
**
*
**
*
**
>>>>>>>>مكتب راكان
قال محمد لراكان :-يبو فيصل للان ماردو الجماعه علينا
ناظره راكان :-ههههههههههههههه والله الازعاج
محمد بقهر من برود راكان المتعمد :-ضامن عمرك انت شعليك حسرتي على الي معلقين بين الارض والسما
راكان :-اصبر الصبر زين
محمد:-للصبــــــــــر آخر ........
كمل راكان يغني :-خلاص عافك الخاطــــــــــر
محمد (مروقين ) :-روح بطــــــــــــريق
راكان :-وانا بطريق
محمد :-خلني على جرحي العتيق
الا وجوال راكان يدق ..
استغرب راكان دانه صاحيه هالحزه ..:-هلا
كانت تبكي :-راكان بروح بيت عمي
اخترع راكان :-دانه شفيك تبكين
دانه المنهاره :-سعاد واحمد صار لهم حادث وهنادي كلمتني تو نفسيتها دمار بروح لهم تكفى
وقف راكان :-تجهزي انا جايك بالطريق بنزلك عندهم وبروح المستشفى
دانه :-والاجتماع الي عندك الساعه تسع
راكان :-خلي الاجتماع يولي انا جايك
دانه :-طيب
سكر راكان الجوال
محمد :-خير الاهل فيهم شي
راكان وهو ياخذ مفتاحه :-احمد ولد عم المدام صار له حادث هو وزوجته
محمد :-لاحول
راكان :-شكلها مصيبه كايده
محمد :-الله يستر رح انت وخل الشغل علي
راكان :-ماتقصر
وطلع بسرعه ...
>
<
>
<
>>>>>>>>> بعد ربع ساعه
دخل راكان البيت وكانت دانه حالتها حاله وتنتظره تحت ...
قال لها :-هدي نفسك يالغلا وان شاء الله خير
اخذت عبايتها :-ان شاء الله
وطلعوا من البيت سالها راكان وهم بالسياره :-ماتدرين بأي مستشفى هم
دانه :-الا بالمستشفى التابع للدفاع المدني
ناظرها وهي شكلها من جد متاثره باين من صوتها :-قلبي ماراح يصير الا الي ربك كاتبه
دانه بصوت كله دموع :-ونعم بالله بس سعاد راحت في غيبوبه
انكمش قلبه غيبوبه !
ذكر واحد من معارفه راح في غيبوبه وعقب كم شهر مات بعد العنا والامال الكاذبه وتعشيم الاطباء لاهله ...
راكان :-الله كريم
دانه :-ونعم بالله
راكان وهو يمسك يدها :-لازم تكونين عون لبنات عمك وتكونين الاقوى بينهم لانهم محتاجين احد قوي ...
دانه :-الله يقدرني
ووصلوا عند بيت عمها ..نزلت دانه وراكان راح للمستشفى ..
دخلت دانه ولقت البيت هاجد ...
طلعت غرفة هنادي ..
الي كانت جالسه تبكي ...
اول ماشافتها هنادي ضمتها من قلب وقالت وهي تبكي :-راحت سعاد يادانه راحت
قالت دانه وهي تبكي :-لاتفاولين عليها لاتفاولين ..
كان باب الغرفه مفتوح دخلت الماس عليهم ...طاح قلبها :-بنات شفيكم سعاد فيها شي
سلمت دانه عليها وغمزت لهنادي تسكت :-شخبارك الماس
الماس بخوف :-دانه شجايبك من صباح ربي
هنادي وهي تمسح دموعها:-فكيت مناحه على دانه و جت بسرعه
عاتبتها الماس :-مالك حق فشلتينا في رجلها
دانه :-لا راكان عنده دوام
الماس :-الا ماعندك جامعه اليوم
دانه :- لا عندي off
الماس وهي تبتسم لهن :-لاتكبرن السالفه الحمد لله ان السالفه كسر رجل مو شي اكبر
ناظرن البنات في بعض ، يعني الماس ماتدري عن الي صار لسعاد صدق !
رقعتها دانه :-معك حق الا شخبار حملك
الماس :-والله تعب الحمل ماتوقعته كذا بس الحمد لله على كل حال .. انا استأذن بروح اريح شوي بتتغدين عندنا
دانه نست كل شي عن الغداء :-مدري عن راكان انا كان عنده شغل تغديت
الماس :-خير ان شاء الله
والتفتت يم هنادي تكلمها :-هنادي عمتو تحت شكلها طفشانه انزلن لها انا تعبت من الجلوس والا كان جلست معها
هنادي :-ان شاء الله
طلعت الماس من الغرفه ، قالت دانه وهي تنزل عبايتها :-شكل سعود ماعلم الماس بالحقيقه
هنادي :-احسن قبل كم يوم تعبت علينا ويوم وداها سعود المستشفى قالت الطبيبه ان تعصيبها وشيلها لاي هم موتر اعصابها وصايبها بتشنج يعني خطر ولازم الواحد ينتبه لها اقل شي يزعلها ممكن يخليها تولد في أي لحظه .. على الاقل ودنا تتعدى الشهر السادس على خير
دانه :-الله كريم (قالت تبي تغير مود هنادي) :-يالله ننزل لعمتي
هنادي زهقانه وعيونها محمره مانامت من امس :-مالي خلق وبعدين فيني نوم
دانه :-لا يالخايسه اجيك وتقولين فيني نوم
هنادي وهي تبتسم :-ما نمت من البارح قالبتها مناحه
مسكت دانه يدها وقالت وهي تجرها للباب :-شوفي الي كاتبه ربي بيصير رضينا ولا لا و الصياح ماينفع الي ينفع الدعاء لله
هنادي بغصه :-هذي اختي يا دانه اختي
دانه كانت فيه بعد غصه بس مسكتها :-واختي بعد ولاتنسين ربك ماينسى عباده (تستهبل) يالله ننزل ونفطر ياشيخه جبتيني من بيتي على الريق
كن هنادي روقت :-فارس احلامك الي جابك هاه
دانه :-هههههههههههههه ايه فارس احلامي عندك مانع
هنادي :-لامانع ولا دواس
وطلعن سوى
قالت هنادي وهن بالدرج ينزلن :-الا رجلك على خبري للحين مزيون
دانه :-ههههههههههههه وزايد زينه بعد
هنادي تحاول تخفف عن عمرها :-ياحظك فيه شبيه فزاع
دانه :-ههههههههههههههههه لا وهو احلى من فزاع بعد
هنادي :-اخ يا البي
دانه اشتغلت غيرتها :- هناديوه
هنادي وهي تبتسم :-طيب نسيت اني طبيت بالعميق
دانه تتوعدها:-ايه لا تنسين بعدين
وصلن تحت صرخت منال :-دندون
دانه :-ههههههههه هلا
منال وهي تسلم عليها :-غريبه جايتنا الصبح
دانه :-ههههههههه طواري كيف حالك
منال :-بخير
دانه :-الا وين عمتو ؟
منال :-راحت للمطبخ وبتجي ..
وجلسن البنات سوى قالت منال لهنادي :-سعود دق وطمنا على احمد يقول طالعين البيت الحين حاول فـ احمد يتغدى معنا وعيا عشان كذا بيتغدى معه .
هنادي بغصه :- وسعاد
منال بحزن :-على حالها فيه تحسن بس طفيف ماينذكر
قالت هنادي وهي تناظر دانه ودموعها بعيونها :-شفتي يادانه
دانه تخفف عنها :-هناديوه أنتي غاويه نكد اليوم روقينا
منال :-وهي صادقه خلينا نستانس قبل لاتنزل شينه الحلايا من فوق
دانه بكره :-ايوه عشان تكمل ونكئب صح
هنادي بحقد :-امس سوت نفسها قدام سعود مصدومه من الي صار لاخوها ماقول الا يا لعنبو خبايري فيها
قالت منال بتغير سيرة نوف الي يكرهنها وتجيب لهن الاحباط:-دريتي ان الاخت انخطبت
دانه :-كح كح غبار
منال تستهبل :-ايه نسيت ان خطيب الاخت هنادي خوي شبيه فزاع
هنادي :-ههههههههههه
دانه انهبلت:-وانتي بعد تقولين شبيه فزاع ماجلس خليجي مزيون الا وشبهتنه فيه
منال بتحرها :-والله شنسوي اذا زين رجلك ماله شبيه ووصيف ومن كل مزيون ياخذ حلايا !
عصبت دانه :-منالوه خمسه وخميسه ان صار لرجلي شي ذبحتك انتي سامعه
منال :-ازعجتينا برجلك وكان مافيه بالكون مزيون غيره
دانه :-ههههههههههه ماينعرف لك
ام سعود قاطعتهن :-هلا والله انا شوف بيتنا منور
وقفت دانه :-ذا نورك ياخاله
وسلمت عليها
ام سعود :-شخبارك يمه
دانه :-بخير الله يسلمك ياعمه شخبارك انتي
ام سعود وهي تجلس :-بخير بفضل ربي
دانه :-دوم
ام سعود :-شخبار رجلك وام راكان ومريم
دانه :-بخير عساك بخير
ام سعود :-الله يجعله
وكن الجو خف شوي منه التوتر بجية دانه ...
&
&
&
>>>>>>>بيت احمد
دق راكان باب البيت وفتح له سعود
راكان :-سلام
سعود :-هلا والله ببو فيصل يالله انك تحييه
راكان وهو يسلم عليه :-الله يبقيك كيف الحال
سعود :-بخير الله يسلمك اقلط
دخل راكان البيت وسال سعود وهم يمشون :-شخبار النفسيه
كئب سعود :-والله يبو فيصل لاتسر عدو ولا صديق
راكان من قلب :-الله يكون بالعون
سعود :-الله امين لازم نجتمع حوله شكل السالفه كبيره
حط راكان يده على كتفه :-الله يقومها بالسلامه وكفاره ان شاء الله
سعود :-يارب
دخلوا داخل كان احمد جاس سرحان
راكان :-السلام عليكم
وقف احمد :-وعليكم السلام
راكان وهو يسلم عليه :-الحمد لله على السلامه
احمد :-الله يسلمك يبو فيصل اقلط حياك
راكان وهو يجلس :-الله يبقيك
راكان :-الله يقوم ان شاء الله الاهل بخير وعافيه
حزنه كان واضح ومتجلي على وجهه :-اللهم امين
كان البيت مفرغ من كل شي وريحة النار تطوف بالمكان .. صح ان شركة التنظيف يشتغلون بتنظيف البيت ومخلصين تقريبا من الدورالاول الا انه واضح ان البيت صايرة له كارثه عظيمه
قال راكان وهو مقدر وحاس باحساسه ، حاس بألمه ، وبكبر خسارته ، صعب صعب بالحيل يتحمل الواحد فقدان انسان يعتبر توأم روح له ..يعتبر حبيب يعتبر دنيا ومدار الافلاك له ولحياته ..
دايم كان لا صلى يدعي يارب اجعل يومي قبل يوم امهاتي ودانه يارب ...
يقدر يتحمل فراقه لهن لكن مايقدر يتحمل فراقهن له ..
يكفي ان فراق ابوه موسم بصدره وآثاره لسى باقيه ..يكفي احساسه بثغره فقلبه من فراق اعز انسان عرفه بحياته ..
عقب موتة ابوه عرف انه وصل لاعظم مراحل الحزن .. انه خسر اكبر خساره بحياته .. لان كل شي يتعوض بهالكون الا الوالدين لا راحوا ما يتعوضون ابدآ !
مر الوقت اخف من الي كان متوقعه راكان صحيح ان احمد حزين ومفجوع بس تفاعل نوعآ ما معهم ومع سوالفهم ..
رغم حالات السرحان والتفكير لبعيـــــــــــد
بعدها بساعه ...كلم محمد راكان وسال عن احمد وقال انه جاي بالطريق ..
استأذن راكان بيطلع برى ثواني يكلم
دق على مطعم وطلب لهم غداء بعد صلاة الظهر مباشرة ..
ورجع لهم مرة ثانيه ...
*
________________________________________
*
*
>>>>>>>>> في ديره بعيــــــــــــــــده
يغار سمعي ويشره كل وجداني
لاغاب صوتك نهار مابلغ سمعي
يالي لقيت بنواعس عينك اوطاني
هي ديرتي هي ملاذ القلب هي ربعي
املي النظر من جمالك يوم تلقاني
واحبس خيالك بعيني حبسي لدمعي
لي شفتك اعيش فعيونك ازماني
واخذ من نجومك واشعل بها شمعي
من نورها سالت الفرحه بودياني
ومن سهرها قام يورق بالذهب زرعي
×
قال زميل سلطان :-علامك سرحان
ناظره سلطان وقال بكآبه :-ولاشي
ابتسم زميله :-حنيت للوطن
قال سلطان بحنين :-مالي غنا عن نجد واهلها الله يعدي هالسنين على خير
زميله :-اللهم امين انا بطلع المكتبه تبي شي
سلطان :-لاسلامتك
لقاها سلطان فرصـــــــــــــــــــه دق على قمر
>
>
>>>>>>>> بيت ابو خالد
ارتجف الجوال بيد قمر وهي تشوف رقم سلطان ..
قمر وهي ترتجف :-الو هلا
اللهفه في صوتها الجمت لسانه
قمر دمعت عيونها :-الو سلطان تسمعني رد علي يا الغالي
تخدر سلطان
قمر من جد جتها الصيحه :-سلطان انت معي
سلطان حس من جد بالغربه الحين ..
غربه في بعده عن ديرته عن خلانه عن اهله وعن حبيبة قلبه وزوجته الي طاح في حبها من اول ماشافها ..
وش الغربه !
الغربه لما تشتاق لاحبابك وبينك وبينهم تفصل المسافات
الغربه لما تحتاج لحضن امك وماتلقاها حولك تضمك وتمسح على راسك بحنان
الغربه لما تفقد صوت ابوك ونصايحه الدايمه لك لانك مهما كبرت بالسن تظل بعينه صغير !
الغربه لما تنحرم من شوفة الي تحب وتنحرم من النوم عينك
قال بحب :-هلا يالغاليه هلا بالحبيبه واغلى حبيبه بعد
قمر :-كذا يا الظالم اسبوع ما اسمع حسك
سلطان :-كنت مشغول بالمحاضرات والدراسه اقوم من صباح ربي وارجع العصر هلكان من التعب وما اشوف قدامي
قمر :-كيف حالك
سلطان :-انا بخير بس مشتاق لك موووووووووووووووت
حمر وجهها :-وانا اكثر
سلطان يستهبل وغافل عن كل الي يصير :-ياويـــــــــــــل قلبي لاتخليني احجز على اقرب رحله للديره واجي
قمر :-ههههههههه هانت
سلطان :-أي هانت والله ان الوقت يالله يمشي عندي ...
ناظر سلطان في بطارية جواله ولقاها بتطفي :-غلاي بسكر الحين ولي مكالمه قريبه جوالي بيطفي وماله شاحن هنا وودي اكلم الاهل ..
قمر :-طيب يالغالي لاتقطع
سلطان :-ان شاء الله ، سلام
قمر :-مع السلامه
وسكرت الخط..
×
دق سلطان على بيت اهله ...
ردت امه :-الو
سلطان :-هلا يمه هلا يالغاليه
ماقدرت ام سعود تمسك نفسها عن الصيحه ونزلت دموعها
خاف سلطان :-يمه شفيك
امه وهي تحاول تتكلم كلمتين .. ومو قادره
قال سلطان وهو يحس بحشره من بعده عنهم :-يمه تكفين طلبتك علميني شفيك لا وقسم بالله آخذ اول طياره جايه الرياض
عاد كل شي ولا دراسة احد من عيالها ومستقبله ...
قالت له :-مشتاقه لكـ يمه مشتاقه لكـ بالحيل
دمع سلطان الغربه خاينه وتهز الرجال :-وانا اكثر يمهـ هانت يالغاليه هانت انتي شخبارك وشخبار صحتك وشخبار ابوي عسها بخير
امه :-نحمده ونشكره انا بخير وابوك بخير انت كيف حالك تاكل زين تشرب زين تنام زين
ابتسم سلطان :-الحمد لله يمه تراني ساكن بمكان كله عرب وسعوديين الاخوان بالسفاره مو مقصرين عنا بشي كنا بديرتنا
امه :-تخسي ديرة الكفار تجي مثل ديرة الحرمين الشريفين
سلطان :-ههههههههه فديت الوطنيه يالغاليه
ودعت هنادي دانه لان راكان جا ياخذها بما انها من الصباح عندهم والوقت الحين عصر .. ودخلت البيت لقت امها تكلم سلطان وتمسح دموعها
ركضت هنادي :-يمه بكلمه
اخذت السماعه من امها :-هلا يا سليطين كيف حالك
سلطان :-ههههههههههه هلا بالخبله هنادي
دمعت هنادي :-هلا بخو الخبله
سلطان :-هههههههههه صايره قويه انتي ووجهك عدتك الاخت سعاد الا كيف حالها
غصت هنادي ونزلت دموعها ..
سلطان :-الووووووو
هنادي ماقدرت تتكلم لان دموعها تنزل
سلطان بقوه :-الووووووووو
ناظر في جواله لقاه للان يشتغل وما قفل
سلطان :-الو هنادي جننتيني ردي
ردت بصوت مبين انها تبكي :-هلا سلطان معك مدري شفيه ارسالك خايس
سلطان مامشت عليه التصريفه :-هنادي شفيكم
تورطت :-مافينا الا العافيه بس مشتاقين لك
سلطان :-تلعبين علي علميني وش صاير ابوي فيه شي
هنادي :-بسم الله عليه ..
سلطان ضاقت اخلاقه :-لاحول بتعلميني ولا شلون
اخذت امها سماعه التلفون وهي تتوعده ..
امه :-هلا يمه
سلطان :- اهلين يالغاليه علامكم فيكم شي يمه تكفين علميني لا تخليني اوسوس
امه :-حنا بخير ونحمد ربك انت انتبه على صحتك وعلى دراستك وارجع لنا بالدكتوراه عشان نرفع بك راسنا قدام خلق الله
سلطان :-تامرين يمه سلميني ع البنات منول وسعاد وسلميني على ابوي وسعود جوالي بطاريته ضعبفه ...............
وانقطع الخط ....................
سكرت امه الخط وهي تدعي من ربها يخليه لها ...
دخل سعود البيت .. في هاللحظه وحمد ربه وكأن وجه امه منشرح
"سلام "
امه :-وعليكم السلام
جا وحب على راسها ..
امه :-يمه ودي ازور اختك بتزعل علينا محد زارها
غص سعود لازم يعلمها بس صعب صعب صعب
مسك يدها وحب عليها :-يمه سعاد تعبانه شوي
امه بخوف :-تعبانه زود عن امس
سعود بضيق وخوف على امه :-يمه سعاد فغيبوبه من امس
انصدمت :-غيبوبه
سعود :-ايه يقولون الاطباء انهم مايدرون متى تصحى ...
بكت امه :-ياويل على شبابك يابنتي ..
كانت الماس توها نازله من فوق وخافت :-شفيكم سعاد صاير لها شي
مسكها سعود بيده الثانيه :-تعالي اجلسي وعن الخوف والانفعال سعاد تعبانه شوي
جلست وهي تناظر وجهه الي فاقد كل الوانه ....
قالت وهي ترجف :-سعود انت من امس مو طبيعي قل لي الحقيقه صحيح اني حامل بس اقدر اتحمل ...
مايدري كيف يبسط لها السالفه لانها كبيره ومالها وصف ولا تبسيط
قال وهو يناظرها :-سعاد فغيبوبه
الماس مو مصدقه :-غيبوبه
سعود :-ايه وماندري متى تصحى !
تهدج صوتها :-ياويل قلبي
عصب سعود :-لاتقلبنها مناحه ولا تفاولن عليها ادعن لها هي سليمه مافيها شي بس السبب انها تنفست كربون بشكل كبير ولولا ستر الله كان ماتت ...
امه بايمانها :-الحمد لله على كل حال
الماس :-نقدر نزورها
سعود :- ممنوعه عنها الزيارات لانها ماتدري عنها على العموم بنصبر كم يوم ونشوف ..
قالت امه له :-يمه تغديت
سعود :-ايه تغديت وانتي تغديتي
امه :-ايه تغديت دانه بنت عمك كانت هنا واشوى اجتمعنا كلنا وتغدينا بوجودها الله يستر عليها خففت عنا شوي
سعود :-وراكان ماشاء الله هو الي غدانا والله راح الوقت ونسينا الغداء مادرينا الا هم يدخلونه علينا ...
امه :-رجال من رياجيل مشهود لهم بالمرجله
سعود :-وانا اشهد ...
وقف وقال لالماس :-صحيني لا اذن المغرب بنام
وقفت الماس وقال لها :-لاتطلعين تعب عليك
وتحت اصراره جلست وطلع هو ...
ويوم وصل لجناحه هو والماس طلعت نوف من جناحها ...
قالت له :-مسا الخير
التفت لها :-مسا النور
نوف :-كيفك
سعود :-بخير
نوف قالت بتردد :-كيف حال احمد
قال لها سعود ويده على مسكة الباب :-ماعليه جسديا بخير ونفسيا تعبان
قالت بهمس وخوف :-سعود ودي اروح اجلس معه كم يوم
انصدم سعود وماصدق الي يسمعه ...
فهمت غلط :-اذا ماتبي براحتك
سعود :-لا بالعكس بس انصدمت
نوف بحزن :-عمري ما قمت بواجباتي صح ولا كانت علاقتي باخواني زينه ودي اعوض شوي عن هالتقصير احس بحنين لهم وشوق ووالله لو ابيع نص عمري عشان ارجع كم سنه ورى واصحح علاقتي معهم ماترددت لحظه .
ابتسم وقال :-خلاص عقب المغرب تجهزي عشان اوديك انا الحين بنام ..
نوف بفرحه :-ان شاء الله
دخل سعود غرفته ... وماصدق حط راسه الا وهو نايم ...
>>
>
>>>>>>>>>> بالشرقيه
دقت رنا على احمد مايرد ....
غريبه !
رجعت دقت على طلال ، بعد الدقه الثالثه :-ياحي زولا كلمني ياحيه ..الزين نجدي والدلع شرقاوي
رنا :-ههههههههههههههههههههه ياعيني على التحريف
طلال :-اعجبك هههههههههههههه
رنا :-كيف حالك وش مسوي
طلال :-ابدآ الستر والحال يسرك انتي كيفك وش مسويه
رنا :-بخير الحمد لله
طلال :- كيف الجو عندك بالشرقيه
رنا :-والله حلو بس رطوبه شوي
طلال :-والله حلو ولا مو حلو مافيه مثل الرياض
رنا :-لا والله
طلال (يستهبل ) :-والله لو تروحين لمجاهل افريقيا ويكون معك فهد لتقولين محلا منها شي
رنا :-هههههههههههههه فديته فهودي ماله مثيل
طلال :-يالله اخلصي بس مافيه شي بالطريق
رنا وهي بتتقطع :-ههههههههه الا فيه
بغى يطيح طلال من كرسي مكتبه بالعمل :-احلفي يعني بصير خال
رنا :-هههههههههههههه بعد 7 شهور ان شاء الله
طلال يتشقق من الفرحه:-احلى خـــــــــــــبر الصراحه والله ودي ارقص من الفرحه
رنا :-ههههههههههههههههه الله يرجك
طلال :-هههههههههههههههههه بالله رجلك وش سوى يوم درى
رنا :- هههههههههههههههههههههه لاتذكرني شوي ويحب راس الدكتوره يوم علمته
طلال :-هههههههههههههههههههههههههه الخبل اذا الدكتوره حلوه ورى ما استغل الفرصه وسواها
عصبت رنا :-لا والله فهودي ثقيل مو خفيف مثلك
طلال :-صدق ماتستحين تراني اكبر منك
رنا :-هههههههههههههه بسنه وحده لاتجلس تتكشخ علي
طلال :-يالله مقبوله منك بس عشان البيبي
رنا :-ههههههههههههههه زين صار لي شفيع عندك ..
الا بدخلة فهد ونست رنا طلال وسنينه ^_* .....
طلال يصارخ بالجوال:-هههههههههههههههه ياخي استحوا على وجيهكم كأن احد منزل السماعه على قناة روتانا سينما
فهد الي سمع اخر كلامه :-ههههههههههههههههههههههه انا مدري الهيئه وينها عنك
طلال :-هههههههههههههههه فال الله ولا فالك ...
فهد :-كيف حالك وكيف حال الجماعه
طلال بجديه :-زين انك انت الي رديت علي
فهد عرف ان السالفه فيها ان! وهو يقول لرنا :-حبيبتي ممكن تجيبين لي كاس مويه بارده
رنا وهي تقوم :-من عيوني
فهد :-صرفت رنا قلي شفيه
طلال علمه بكل شي.....
انصدم فهد وضاقت به الدنيا ...
رجعت رنا وعطته المويـــــــــــــــــــه ..اخذها منها بدون مايتكلم
رنا وهي تشوف ملامحه متغيره :-فهد فيه شي
فهد بهدوء :-سعاد اختي صار لها حادث وفي غيبوبه
حطت رنا يدها على قلبها :-هااااااااااااااه
فهد :-واحمد نفسيته يقولون تعبانه بالحيل
رنا بصدمه :-وش السالفه وش صار
فهد :-احترق البيت وكان احمد بالدوام ...وسعاد نايمه وما انقذها الا لما تنفست الكربون واثر على دمها عشان كذا تعطلت بعض خلايا المخ وراحت بغيبوبه عند الله خبرها
دمعت عيونها وسالت الدموع ...
تذكرت سعاد الحنونه الي ماقصرت عنها بشي ، سعاد الي استقبلتها بكل رحابة صدر وهي توها عروس
سعاد الي كانت لها صديقه واخت وام
سعاد الي ساعدتها في تجهيزات زواجها ومابخلت عليها بالنصح والتوجيه !
قال فهد وهو يحاول يكتم حزنه ودمعاته :-بحاول اخذ اجازه كم يوم ونرجع للرياض
رنا :-ياليت لازم نكون معهم بهالوقت
فهد :-الله يقدم الي فيه الخير .