الحلقة الثالثه عشر
الدانه ــ بأي حق يكلمني جي؟؟
هدى ــ ما عليج منه .. هذا فيصل ..محد يقرب منه ..تراه عقرب ..
الدانه ــ ماتوصل لها الدناءة وقلة الادب ...
هدى ــ بس موقفج كان قوي ..ورديتي عليه بأسلوووب روعه ..برودج وثقتج في نفسج بعد هالكلام القاسي ..كانت في محلها ..
دانه ــ خل نروح لتركي .. نشوف آخر أخبار المنتدى ..
طلعت لتركي هي وهدى ...وتكلموا عن آخر المستجدات ..
تركي ـــ أدري فيصلوه مصخها معاج ..
دانه ــ لا ..عادي ...شو تركي تكلمت مع حسن ورضى يآخذك معاه سيلين ..ويقول الشرط لوحيد انك تجي بروحك ..لانها جمعة شباب ..
تركي ـ بس يالدانه أنا متردد ...أنا من زمان ما طلعت من البيت . ما أروح إلا مواعيد في العياده ..بس ...حتى المدرسة ما اروح لها ..
دانه ــ لاتخاف ...حسون أنا واثقة منه ..أكيد بيدبر لك رحلة عجيبه ..
تركي ــ اوكي .
دانه ــ اوكي ..شوف تركش ...ترى حسن بيمر الخميس يآخذك في الليل ..وذا ما عجبك الوضع كلمني على طوول ..
تركي ــ اوكي ..بس لاتناديني تركش ..
دانه ــ لاتزعل مني ..بس وصيت حسنسن يناديك تركش ..هههههه
تركي ــ أنا براويج .. الحين شيضمن لي ان ولد اخوج ما بيشيع هالتدليع بين ربعه ..
دانه ــ ولا شي ..لانه شاعه اوريدي ..ههههههههههه
تركي ــ الحين اسوي لج بانديد ..هالحين ,,
دانه ــ ما سويت شي يخليك تمنعي ..
تركي ــ لاتنسين أنا المدير لهالمنتدى ..اوكي ...
دانه ــ ترى والله العظيم ياويلك .. حرام عليك .. أنا أكثر وحده تعاقبها في هالمنتدى ..
تركي ــ تستاهلين ..
****************
ــ حمدالله على السلامة ..
ــ الله يسلمج ..
دخل لغرفة كانت مقفولة طول الوقت ..
استغربت الدانه ..كان تبي تروح ورا طالعت نفسها ..طالعت شعرها اللي فتحته..والمكياج الخفيف اللي حاطته ..والبدله اللي كانت لابستها ..ما كلف نفسه وطالع لها نظرة ..مو كافي اسبوعين ولا مفتكر فيها؟؟
لمت شعرها ..سوت اللي عليها ..اتصلت في قمر ..
قمر ــ هلا عميمة .
دانه ــ هلا ..شفيج ؟ أحسج مكتئبة؟
قمر ــ في هالبيت بروحي ..ما تبيني أكتئب ؟؟
دانه ــ خالج يا ,..تعالي مري ..
قمر ــ ما اقدر اليوم ..ام الليل تبي تمرني ..
دانه ــ ليلى؟؟ الحمارة من ملجت ولا فتكرت فيني ..
قمر ــ ما أدري شفيها ..العرس بعد اسبوعين وهي متضايقة ..قلت أستدعيها وأشوف السبب ..ونفتح محضر ونشوف من المذنب و من البرئ ..
دانه ــ تدرين ...هالحين بيي ..انطري شوي ,,
قمر ــ خالي توه رجع من السفر ..
دانه ـ هو نايم هالحين ولا بيطلع .. مسافة الطريق وأكون عندج .
صكرت دانه من قمر..كل شي عندها ولا خالد وليلى..أولوياتها تقتصر فيهم هم بس..ودام ام الليل متضايقة لازم تنفرد فيها ..وتحاول تهديها ..
قربت من غرفة ضاحي ..ورفعت يدها تبي تطق الباب لكنها صوته كان وايد عالي ..
))لا يا حبيبتي ...لاتخافين ..بعد بكره برجع أسافر بنغلاديش يومين وبمر لج اسبوع ....((
انصدمت دانه ...تيبست من الصدمة ..حبيبتي ؟؟ يومين وامرج اسبوع ؟؟ يمكن يكلم أمه ؟؟ أمه في البحرين..صج هو ما يهمها ..وشلون ما يهمها وهو زوجها خلاص؟؟ ارتبكت ..خذت نفس ...وطقت الباب ..
حست بربكة داخل ..
فتح الباب ..
ـــ نعم..
دانه ــ بروح لقمر اذا ما عندك مانع ..
ــ ما عندي ..
صكر الباب في ويهها ..انصدمت ..ارتجفت يدها ..السالفة فيها إن ...
التفت تبي تروح الغرفة تبدل ..طلع ــ من بياخذج ؟؟
دانه ــالدريول ..مصطفى .
رد صكر الباب..انصدمت دانه.. هل هي متأكده أنها متزوجة هالشخص؟؟ اللي زين منه يطل في ويهها ؟؟ دخلت غيرت ملابسها ..وطلعت ..
******************
انتهى خالد من كل اوراقه ...وتأشيرات وأوراق الدراسه...بس بقى العرس ..اللي تقريبا انتهى من الحجوزات ولاشراف..حس أنه تعبااان ..أسبوعين ويخلص كل شي ...صج لاهم مثل هم العرس ولا وجع مثل وجع الضرس .
عبير ــ ..بو وليد ..
خالد ــ هلا ..
عبير ــ متى تييب العمال يسوون لك الغرفة والطابق اللي فوق ؟
خالد ــ مأجل الفكره ...انا وبدور ليله العرس بنسافر ..وبنيليس ست شهور قبل لا نرجع . زيارة اسبوع بعدين نرجع نسافر ..
عبير ــ واذا حملت بدور؟
خالد ــ فكرة الحمل مؤجله ثلاث سنوات ..يمكن أكثر ..
عبير ــ حرام عليك خالد ...
خالد ــ شفيج؟
عبير ــ أمي تبي تشوف ظناك ..
خالد ــ بعد ثلاث سنوات ..
عبير ــ ما أقساك يا أخي .ما أقول الا مسكينه هالبدور ..
خالد ــ جب ..جب ..
عبير ــ اييه ..ويا حريمكم ما أحلاكم ..وويا خواتكم شياطين مسلطة ..أنا قايمة لغرفتي ..
خالد ــ أحسن ..تريحيني افتك من وجع الراس .
حس خالد أنه قسا على عبير.. عبير كلها اسابيع وتنزف لبيت ريلها .وبيفضى البيت على امه وأبوه ...ما يقدر يترك بدور هنا..توه متزوج ..وهي نفسها موب مالت واجبات ومايضمن انها تشيل امه وابوه في غيابه وتراعيهم ...
***************
فكرت دانه تتصل في خالد ..وتكلمة تسأله عن صحته ..وعن ليلى ..
مسكت جوالها .....وطلعت اسمه واتصلت فيه .
****************************
رن جوال خالد ...انصدم بالرقم ..كانت دانه ..دانه متصل فيه؟؟ عسى ما شر؟؟
ــ الو ..
دانه ــ هلا خلود ..حبيبي ...شخبارك؟؟ ألو خلود ..وينك يالغالي؟؟ خالد ...ألو ..خالد ووجع ..
طبعا خالد من الصدمة ..ماقدر يرد ولا يتكلم ...
دانه ــ ..خلود ..عمري ..ليش ماترد؟..ألووو ..ألوو ..
خالد ــ هلا دانه ...
طبعا دانه أول ما اسمعت صوت ثاني غير صوت خالد ...اسكتت ..حست بربكه..
ــ خالد ولد ناصر؟؟
خالد ــ لا ..أنا ولد خالج ...
دانه ــ اوه...السموحه ولد الخال ...أزعجتك ..كنت أبي خالد ولد أخوي ..ما أطول عليك ..
خالد ــ معقول ؟؟ لاسلام ولاسؤال عن الحال؟؟
دانه وهي بالعة احراجها غصب ..ــ اوه ...اعذرني والله من الربكة والاحراج ...شلونك؟؟ شخبار البدور؟؟ متى انشاءالله ترجع من السفر؟
خالد ــ قريب انشاءالله ..بتحضرين العرس؟
دانه ــ شي أكيد ..مع أني سمعت من البدور انك ماييت عرسي ..
خالد ــ معليش يا بنت عمتي اعذريني ...والله ماكنت فاضي ..
دانه ــ عذرك معاك يا بو وليد ..عن اذنك ..الحين ..
خالد ــ دانه..
دانه ــ لبيه ...
خالد ــ شلون ضاحي معاج؟؟
دانه ــ الحمدالله يعزني ويكرمني ولا بنت شيوخ ..
خالد ــ وأنتي بنت شيوخ .. اذا تعدى حدوده معاج ..أو ..
دانه ــ لا ..ما توصل يا ولد خالي لهالمواصيل ..لي أخوان أسند فيهم ظهري ..بس تسلم ...
خالد ـ صدقيني يالدانه..أنا موجود ..اذا تبين أي شي ..
دانه ــ تسلم ..والله يوفقك مع البدور ..تراها بنت طيوبه ..عن اذنك ..
خالد ــ اذنج معاج ..حياج الله ..
صكر من عندها ..وهو حاس بفراغ داخله ..دانه حسسته بهالفراغ ..حس أنه ضيع فرصة من يده ..صوت دانه شلون خلاه مو على بعضه ..وكلامها المتزن ..طبعا في البداية ما هو الا لبس ..
أما بالنسبة لدانه ..كانت غارقة بدموعها ...وتصيح بقوة..
شالمشاعر الغلط اللي داخلها ؟؟ وليش الحين موب قبل؟؟
(كلامة كان حلو وايد ..حسيت فيه لهفة ..حسيت ؟أن فيه ..أستغفر الله يا ربي ..أنا على ذمة ريال وأفكر في غيره ؟؟ أستغفر الله ..كل السبب منك يا ضاحي ..أنت اللي خليتني أفتح الدفاتر ..أنت اللي خليتني أنتقم لكرامتي بدون شعور ..(
وصلها مسج ..زاد دموعها بزياده ..
(مدري رجا مدري وفا مدري احساس ..
أنطرك أدري قلت لي منت راجع (
ومثل ما توقعت كانت من خالد . ...حذفت رقمه من الجوال ... وكتبت مسوده في جوالها ..
(خبرتك انسان ذكي فاهم وواعي ..انسان يعرف قراره ماهمه وداعي ..
فلا تتمنى وترجى وتحاول خداعي ..ولاتذل نفسك ترى ماله داعي (
اتصلت في خالد ولد ناصر .
ــ ألو ..
خالد ــ هلا ..دانه شخبارج؟
حست دانه أن خالد تعبان ..
ــ شفيك خالد صوتك موب طبيعي؟
خالد ــ لا ..بس اليوم كنت في دوامي ..وطحت عليهم ..
دانه ــ شلون ؟؟؟عسى ما شي جايد؟؟
خالد ــ ما شي جايد .. ما كنت مآخذ الدوا الصبح ..تضايقت أنهم قالوا لأبوي ..
دانه ــ قالوا لناصر؟؟ وشقال لك؟
خالد ــ كان يبيني أسوي فحوصات بس رفضت وقلت له انه انخفاض بضغط ادم ..من كثر ما كنت مشغول للعرس ..ما صدق ..
دانه ــ زين ..وأنت الحين؟
خالد ــ خذيت الدوا موب مشكله ..الطيحه مازادت عن عشر دقايق بس ..وقدرت أسند طولي لين ما وصلت البيت ..بس أخوج ..موب مقتنع .
دانه ــ يا عمري يا خالد ..يا عمري ..راعي نفسك ..ما نبي نخسرك ..
خالد ــ أدري .. بس كنت مستعجل ..يوم قلت ليلى ..تضايقت وبدت تصيح ..ندمت أني قلت لها ..
دانه ــ حرام عليك ..
خالد ــ أدري ..دانه أنا الحين عند الإشاره ..وبتحول خضرا في أي وقت ..وأنا مشتت ..
دانه ــ اوكي ..حط بالك على نفسك ..مع السلامة .
صكت من عنده ..وكان سبب كافي تنزل دموعها ...وانهارت تصيح بقوة ..بعدين هدت نفسها .. دقايق وتوصل بيت أخوها نايف ..
دخلت بيت نايف ..كانت قمر ناطره ..ومعاها ليلى ..
دانه ــ السلام وعليكم السلام ..
قمر ــ زين ييتي .. خذي ليلى وطلعوا غرفتي ..بسرعه ..
دانه ــ ليش ؟
قمر ــ بتييني اليوم يدتي ..من البحرين راح أبوي ييبها من المطار..
دانه ــ شلون؟
قمر ــ تو أبوي اتصل فيني وقال لي أنها تهاوشت مع خالتي ..ويات بتسكن هنا ..خصوصا بعد ما اكتشفت ان يدي مطلقها ..
دانه ـ شلوون ؟؟
ليلى ــ هاي ..
دانه ــ أنا بريحج مني الدريول برا ..تعالي ليلى نروح مكان عام .بكره بزورها أنا ..لأن ضاحي ما يدري ....ولا تدرين ..اليوم انشاءالله في الليل بنيي ..
قمر ــ بيكون أحسن .
طلعت دانه مع ليلى ..واتصلت في ضاحي
دانه ــ هلا ضاحي ,,ضاحي ترى ما رحت لقمر ..اتصلت فيني خطيبة خالد وطلبت نطلع مع بعض اذا ما عندك مانع ..
ضاحي ـ زين .
وصك التلفون ..اتصلت في قمر ــ قمر ..محد يدري أني أدري أن عمتي موجوده ..أوكي؟
قمر ــ ليش ؟
دانه ــ بس جي ..اليوم المسا بزوركم مع ضاحي اوكي ؟
قمر ــ اوكي ..باي .
التفت لليلى ..
ــ اتصلت في خالد ..وقال لي شصار معاه اليوم ..
ليلى ما مسكت نفسها ..وانزلت دموعها ..
ــ حرام ..والله خالد ما يستاهل ..
دانه ــ أم اللول ..بس ..بتقلبينها نكد؟؟
ليلى ـ المصيبة أني حبيته ..
دانه ـ صحيح ؟ في هالاسبوعين ؟؟
ليلى ــ ما تشوفينه يوم يكلمني ..غير ...انسان راقي مثقف ..محترم ..
دانه ــ أنتي متأكده تتكلمين عن خالد ولد ناصر؟؟
ليلى ــ اييه ..ليش شي قلته غلط ؟
دانه ــ لا .. حاشاج ..بس دايم ..الرياييل لهم ويهه ثاني مع حريمهم ..ما تعرفينه .
ليلى ــ يعني موب صحيح؟؟
دانه ــ لاء صحيح ..بس كنت شوي بخرعج ..
ليلى ــ اييه زين .. صج ضاحي رجع ؟
دانه ــ اييه . تدرين لو اللي في بالي صحيح .. والله العظيم ماني عايشه معاه دقيقة وحده ..
ليلى ــ وشو الي في بالج ؟
دانه ــ شي ..
ليلى ــ شكله جايد .
دانه ــ أييه .
ليلى ــ قولي لي ..
دانه ــ اوكي ..بس ننزل ..مصطفى ..خذنا البخاري ..
ليلى ــ بس أنا تغديت ..
دانه ــ أنا لاء ,,
فتحت ليلى حلجها على كبره بعد اللي قالته لها الدانه عن حياتها ..
دانه ـ طبعا هالكلام بيني وبينج وإن وصل لخالد بيكون آخر يوم في عمرج ..واييه .صكري حلجج لوزج طلعت لبرا .
ليلى ــ الحين تقولين لي أن ..
دانه ــ اييه ..
ليلى ــ وهذا فيصل؟؟
دانه ــ ما أدري ..بس موب مرتاحة له ..
ليلى ــ وخالد؟
دانه ــ ............................ ما أدري ..بس هو صار ريل البدور ..
ليلى ــ بس ..من كلامه ..
دانه ــ خالد ...مستحيل ..مو بس لأنه ريل البدور ..والسبب الثاني ..أنه ناصر قال له بتتزوجها ولا لا ..قال لاء ..يعني رفضني .هذا غير ان قمر تموت بترابه !!!!
ليلى ــ مسكينه قمر ..أتخيل موقفها لما عرفت بزواج خالد وبدور ...زين ..شبتسووين لو اللي تفكرين فيه صحيح؟
دانه ــ انت ..شرايج ..تكتشفين أن زوجج ..قضى أول اسبوعين من حياتكم مع بعض مع وحده ثانية ؟ هل بترضى كرامتج تكملين ثانية معاه ؟؟
ليلى ــ أنا واثقة في خالد ..
دانه ــ ليلى ..
ليلى ــ كنت أمزح ..بس انشاء الله ما تكون شكوكج صحيحه ..
دانه ــ شسوي الحين؟
ليلى ــ حاول تهدين ..وبكره الستار ينكشف ..
دانه ــ زين شفيني ما يخليه يقرب لي؟؟
ليلى ــ يمكن الليله الأولى ..لما ..نمتي؟
دانه ــ والله ما كنت أدري ..موب قاصده ..معقول يآخذ مني موقف لها السبب ؟؟
ليلى ــ يا عمري يا دوين ...
دانه ــ الظاهر خالد يحش فيني دايم جدامج ..والا من وين يبتي دوين؟
ليلى ــ مرة ولا مرتين ..يتكلم أنج السبب في انه تزوجني ..ويشكر الله ..
دانه ــ ...متى عرسكم بالضبط ؟
ليلى ــ بعد عرس البدور بأسبوع وأربعة أيام .
دانه ــ قرب ..وفستان العرس؟
ليلى ــ مشى الحال واشتريته من دبي .
دانه ـ ما راويتيني اياه يالنذله .
ليلى ــ تعالي البيت أراويج اياه ..بس طلي ..موب مثل خالد ..مارضى حتى أنه يزورني .بس شوفي البرايت سايد ..
دانه ـ ها؟
ليلى ــ شوف الناحية الزينه ..هو قال وأقصد بهو ضاحي ..قال يومين في بنغلاديش وأسبوعين معاج ..يعني أسبوعين ويومين. ..وأنتي قلتي لي أنه غاب بالضبط بس أسبوعين ..!!!!!!!!
دانه ــ والله أنج ..مهسترة ..شتقولين ويا ويهج؟؟ ذي بالنسبة للمرة الياية اللي يسافر فيها ويا ويهج !!
ليلى ــ ما تدرين ..
دانه ــ قومي قومي ,,,تراني شبعت ...
ليلى ــ كيفج ..بس حاولي تتفائلين دايم ..وتذكري ..
دانه ــ شتذكر ؟؟
ليلى ــ لازم زواجج ينجح ..والا بتظلين بعدين متشحططة بين بيوت أخوانج ...ما بتلاقين أي بيت يضمج ..خصوصا بعد الطلاق ..
نزلت دانه راسها .
ــ لي متى بيظل محكوم علي بالتشتت ؟؟
ليلى ــ تذكري ..هالقرار في يدج ..
دانه ــ............... ما أدري .. في يدي ..أو في يد مين ..إذا الشخص اللي تزوجته ما يطل في ويههي حتى ..ليلى ..أحس أني ضايعه ..مالي مكان ..سواء كنت متزوجة ..ولا لاء ..
ليلى ــ دانه ..دانه ..أرجوج ..لاتصعبين الأمور وتهولينها لي هالدرجة ..
دانه ــ أحس أن حياتي ضاعت .. طول عمري أنا وأمي الله يرحمها كنا عايشين متطمنين ..ما همنا حد ..من توفت وأنا حياتي ضاعت ..صرت المربية الرسمية لعيال احواني وبناتهم ..انا موب معصبة من هالشي ..بالعكس ..على الأقل ..عيال اخواني رغم أنهم أكبر مني يحبوني وأنا أموت بترابهم ..والبنات نفس الشي ..لكن ..أنا اللي ضعت . دايم ..من مكان لمكان شايله هالشنطه ...لاهم راضين يرحموني ..ولاراضين رحمة الله تنزل ..ندمت على قرارت وايد ما اتخذتها ..لو أني متزوجة عامر؟؟ لو أني رضيت بخالد أيام ما كانت أمي تحن علي بالزواج منه ؟ يمكن كان أحسن لي من هالضياع اللي أنا فيه الحين ؟
*****************************
فهد ــ خالد ..شفيك ؟
خالد ــ لا ..ما في شي ..شلون الزواج معاك ؟
فهد ــ لو أدري ..كان أجلته أربع سنوات ولا خمس ...الالتزام صعب ..
خالد ــ كلكم تقولون جي ..لكن لو رد بكم الزمان كان تزوجتوا بنفس العمر ..
فهد ــ خلص غداك ... لي متى بتظل تطالع في هالجوال ؟
خالد ــ ناطر مسج .
فهد ــ عذرا للتطفل ..من مين ؟
خالد ــ من المدام ..
فهد ــ آه ..المدام اللي في باغي ؟
خالد ــ في باريس ..وي .
فهد ــ وشاللي يخليك متأكد أنها هالحين في باغي مع هالوجوه السنعه والمناظر السنعه ..تفكر تطرش لج مسج؟
خالد ــ شافت أشياء حلوة ..أكيد بتتذكرني ..
فهد ــ يا غرورك يا خي ..مصدق نفسك .
خالد ــ تنكر أني أجمل منك ؟؟ وأوسم وأحلى ولو شافتني مرتك تتحسر على زواجها منك ؟؟
فهد ــ بس بس ..
خالد ــ ناهيك لو عرفت أني دكتور ..
فهد ــ خلاص ..فهمت !!! وصلت الفكرة ..
خالد ــ ما أبي أمدح نفسي ..
فهد ــ للحينك ما مدحت نفسك ؟؟ شباقي بعد تمدحه ..
خالد ــ وايد ..ما بمدحلك شعري وعيوني ولا ملابسي ولا أخلاقي ..ولا سيارتي ..
فهد ــ باااااااااااااااااااس ..يا أخي والله فهمنا ... وصل الحجي ..بس ..اكرمنا بسكوتك ..الله يهني مدامتتك فيك ..
طبعا خالد كان ناطر المسج من دانة ...موب من بدور ..
فهد ـ خالد . .. ادفع الحساب .
خالد ـ كالعاده ماتغير فيك هالطبع الشين .
فهد ـ شسوي ..مفلس .وآخر الشهر بعيد .
خالد ـ ارحمني يا أخي وراي عرس بيكسر ظهري من مصاريفه ..وكافي دافع مهر ميتين ألف للمدام .
فهد ـ الله ,....ميتين ألف ؟؟ ششاري فيلا ؟؟
خالد ــ لا ولا حتى بيت شعبي ....الفلل هاليومين بمليون وطالع...
فهد ــ يا بني ..ماذا فعلت بك الأيام ليرتسم الحزن على ملامحك بقسوة؟ ؟
خالد ـ فعلت ما فعلت ..لين الحين تتذكر المسرحيات ؟
فهد ـ وأنا أقدر أنسى .. يمكن أشتغل ممثل ..
خالد ــ ممثل ؟
فهد ـ عندي الموهبة ...وبعدين..المربح أكثر .
خالد ــ خل نقوم .. برجع البيت أضبط أموري .
فهد ـ يالله ..
دفع فهد الحساب وعصب يوم خالد طلع بوكه ..وقال له انه ما كان يقصد إلا انه يمزح .
*****************
كانت دانه في غرفتها ..مرت غرفة تركي .. لكنه كان طالع ..ابتسمت ..أخيرا تركي شوي خفف من عزلته . من عرف شلة حسن وهو كل يوم معاهم ..
البنات طالعات للسيتي سنتر .. حست بضيج ..طلعت من غرفتها وتمت في الصالة تقلب في قنوات الريسيفر ..
طالعت الغرفة اللي حبس فيها ضاحي نفسه .. حست بضيج أكثر . .بعد شوي تروح مع ضاحي لأمه .. ياترى شبتقول لها ؟؟ واذا سئلتها عن الحياة هنا شبتقول ؟؟
ــ في ايش سرحانه ؟؟
التفت ..وعدلت شيلتها ..
ــ أنا زوجج ..تعدلين شيلتج مني ؟
دانه ـ .......
نزلت راسها الدانه ..
ــ لها الدرجة ما تبين تطلين في ويههي ؟
دانه ــ لا ..موب القصد .. بس ..
ضاحي ــ اتصلت فيني قمر ..وقالت لي أن أمي يات . وطلبت مني أييبج معاي ..اوكي ؟
دانه ــ أوكي ..
ضاحي ــ وشفيج بالقطارة تتكلمين ؟؟
دانه ــ مافي شي ..
ضاحي ــ زين قومي بدلي ثيابج ..بنروح الحين .
دانه ــ الحين ؟
ضاحي ــ عيل متى ؟؟ الساعة خمس ونص ..
دانه ــ زين ..
طبعا كلماته خاليا من أي لون أو مشاعر ..كان يكلمها مثل ما يكلم قمر ولا هدى ..ماحست أنه ملتزم ناحيتها بشي ..
قفلت باب القسم .. وظل ضاحي برا ..وكانت تبي تروح غرفتها ..لكنها لقت الغرفة اللي كانت دايم مقفولة مفتوحة .. ما قاومت فضولها ..ودخلت .
طبعا ..غرفة ما فيها أي لمسات ..جرداء .. سرير واحد..كبير مع شرشف أبيض ..ومكتب كبير عليه أوراق وايد كثيرة ..الشي الوحيد اللي حست فيه حياة كان قلاس ماي فيه وردة فل وحده ..حتى الوردة مسودة شوي ..وريحتها شوي خفيفه ...ليش كان قافلها ؟؟ مافيها أي شي ..حتى خزانه مافيها !!طالعت الأوراق اللي على المكتب .. كانت معاملات .. بس ..أو مسودات ..يعني شغله .. والادراج مافيها شي غير أوراق ..عصبت ..مافي في الغرفة غير كرسي .. واحد ..غرفته تقريبا لاتكلمت فيها ..شو تكلمت ..لا تنفست بقوة بتسمع صدى نفسها..الأرض سراميك مشجر ..لونه باهت .وماعليه إلا قطعه سجاد صغيرة ..
حتى الستارة .. كانت بيضا باهته ..
طالعت الأرض .. كانت شنطته على الأرض ..ما منعت نفسها من أنها تفتحها ..بس ما كان فيها شي . غرفة فاضية باهته .. ليش يقفلها ؟؟
شالسر يا ضاحي ؟ كان في تلفون وفاكس على المكتب .. ولاب توب .. اللاب توب موصول بالنت ..
فتحته بشويش .. وشيكت الإيميلات المفتوحة .. ماكان فيها شي .. كلها من أشخاص .. أجانب . وكلها دعوات وأمور رسمية . عصبت .. شالسر ؟
صكت اللاب توب . رمت بجسمها على السرير .. ومسكت المخده وحظنتها بقوة ..
حست بقهر .. خل تطلع ..لايرجع ضاحي .. أول ماكانت تبي ترجع المخده ..انصدمت ....
كانت صور وايد تحت المخده .. ما مسكت دمعتها .. كان ضاحي مع وحده .. بسيطة .. باهته .. جمالها بسيط موب اللي يشد .. وشعر بني .. بس الصور تبين شي ثاني .ضاحي يضحك .. معاها .. وله صورة شايلها .. وصورة ياكلون مع بعض سندويتشات .. ويده كله على خصرها .. وصور لها وهي تضحك .. وهي تصارخ .. شي واحد كانت متأكده منه الدانه .. أنه ضاحي هذا اللي في الصور ..موب نفسه ضاحي اللي برا !!
الللي في الصور ..انسان ..ملامح ويهه تنطق أنه سعيد .. وفرحان .. مافيها أي قبح .. وهالانسانه اللي معاه ..فرحانه أكثر منه .. وهذا يعني أنهم يحبون بعض.. طالعت الصور وخلفيتها .. ما كان مكتوب شي .. طالعت ملامح ضاحي .. كان شخص وسيم في هالصور.. أول مرة تشوفه وهو يضحك .. موب معصب . ولا عاقد حواجبه بطريقة مزعجة.. ولا نظراته نارية مثل ماهي هالحين.. رجعت الصور مكانها .. ورتبت المخده مثل ما كانت وطلعت برا الغرفة ورجعت الباب مثل ما كان . فتحت باب القسم .. ودخلت غرفتها .. وقفلت الباب .. دخلت الحمام .
((مستحيل .. مستحيل .. شالحظ الردي .. شالحياة التعيسة ؟؟ حتى في زواجي ماني موفقة .. آآآآآآآآه يايمه .. ليش دعيتي علي ؟؟ ليش متي وأنتي موب راضية عني .. ليش يا يمه ليش ؟؟؟؟ ((
دخلت تحت الدش وفرغت كل الي في قلبها من دموع ..
*************
في السيارة ــ شتبين أحط لج أغاني ؟
دانه ــ ما أبي شي ..
(حتى راعي المطعم أو البقالة يكلمني بطريقة محترمة أكثر منه ,,(
كانت دانه مكثره من هالمكياج وضاحي كان كل مرة يطالعها مستغرب ..
ضاحي ــ شالحمار اللي في ويهج ؟؟
دانه ــ أسمه بلاشر ..أحمر خدود ..
ضاحي ــ وليش مكثر منه ؟
دانه ــ أنا حاطته بشكل عادي لاني مكثرة ولاشي ..
ضاحي ــ زين ليش معصبة جي ؟
دانه ــ موب معصبة .
ضاحي ــ شيلي منه .. تراج مبالغه وايد ..
دانه ــ حاضر .. طلعت البودرة وخففت شوي ..
ضاحي ــ مع أنه يبي له تخفيف .. بس جي أهون ..
(شيبني ؟؟ أشبه ذي اللي معاه في الصور ؟ أكون شاحبه وباهته ؟؟ (
كانت دانه لأول مرة تحط مكياج وايد كثير .. والروج غمجته وايد .. (كان أحمر فاقع . مطلعها وايد أكبر من عمرها مع أنه وايد حلو .. (
مر محل حلويات .. وشل معاه صحنين بقلاوة وبسبوسه .. وكنافة ..
كان طول الطريج ساكت .. وهي بس تطالع من الدريشة . كاتمه غضبها وعصبيتها ..
وصلت البيت .. سلمت على أم ضاحي ,.,
أم ضاحي ــ هلا بأم سبسب .
دانه ــ .................... ؟ هلا فيج ..
(الدانه على بالها أن عمتها تسبها .. وما حبت تكون قليلة أدب وترد ..(
قمر ــ يدتي .. شاللي قلتيه لعمتي ؟؟ مسبة ؟؟
ضاحي كان منزل راسه .. ودانه ما طالعت له ...ناطره الإجابة من عمتها أم ريلها ..
أم ضاحي ــ كان أمها الله يرحمها تناديها جيه .. وهي صغيرة ..
قمر ــ وشيعني أم سبب ؟؟
؟أم ضاحي ــ والله أنكم بنات هاليومين ماتعرفون شي .. أم سبسب ..موب أم سبب .. و ينادون به البنات اللي شعرهم ناعم ..
ابتسمت دانه ..
قمر ــ يعني أنا أم سبسب بعد ..
أم ضاحي ــ لا يا يده ..أنتي الخوص ..
قمر ــ what ?
أم ضاحي ــ وطوطج الدهر .. أم سبسب اللي شعرها ناعم وايد .. والخوص اللي شعرها ناعم بس عادي .
قمر ــ يدتي المفروض تشتغلين في شركة شامبو .. علشان تحددين أنواع الشعر لهم,,
ضحكووا الكل على قمر ..
ضاحي ــ يوزي يا قمر عن يدتج ..
قمر ــ يا خالي .. المفروض أنك تزوجت المفروض تفج من هالعقدة ..
ضاحي ــ أي عقده ؟
قمر ــ اللي بين حواجبك ..
ابتسمت دانه لما ضحك شوي ..
قمر ــ عمتي ..تعالي معاي المطبخ .. أشوف الطباخ شسوى .
البست الدانه شيلتها .. وكانت لابسة دراعة من اليشمك ..لونها أحمر غامج.. وايد حلو والشك اللي عليها وايد حلو ..
في المطبخ ..
قمر ــ اووووه.. شالكشخه عمه . .. ماعهدناج تكثرين مكياج ..
دانه ــ تزووجنا . وتغيرنا ..
وصل للدانه مسج ..
((أقول دانه .. مريني بكره )) حمد .
دانه طرشت ( وعليكم السلام وين أمرك ؟؟ في بيت ناصر ؟ (
وصل مسج ثاني (( عيل وين ؟؟ ((
حست دانه أن حمد . شوي معصب .. أو في شي مضايقة .. ماطرشت له مسج .. ردت لقمر ..
ــ شالعشا اليوم ؟
قمر ــ طابخ أشياء عادية .. بس قلت له يسوي لي دجاج ايطالي .. لي ولج ..
دانه ــ اوكي .. العرس قرب .. خلص فستانج ..
قمر ــ ليش أنا ما قلت لج ؟
دانه ــ لا .. ما قلت .. ايش ؟؟
قمر ــ يعني قلت لليلى .. مممممم .. ما راح أحضر العرس ..
دانه ــ شلون ؟؟
قمر ــ ما أقدر أحضر .. إذا حضرته بموت ..
دانه ـ لكن .. هذي أختج !!!الوحيده .. التوأم .. مابتحضرين عرسها ؟؟
قمر ــ عرسها بيكون جنازتي ... ما بقدر أحضر ..noo way !
دانه ــ قمر .. تخيلي البدور .. تخيليها واقفة هناك تبي أقرب الناس لها .. واللي هي أنت تكون بقربها .. يوم عرسها ..
قمر ــ أنتي وعبير تكفن وتوفون .. وبعدين ..البدور أصلا ما تبيني أحضر عرسها على كل حال ..
دانه ــ هي قالت لج جي ؟
قمر ــ لا .. بس من فترة موب قريبة .. قالت لي يوم عرسها .. أنا بخرب عليها .. لأن بنكون نشبه بعض وايد .. فما في مجال . .. وأنا بسوي نفسي مريضة ..أو أي شي ثاني ..
دانه ــ قمر .. ما ..
قمر ــ دانه ...بدور أي سبب انشاءالله أحذف نفسي على الدري وأكسر ريولي .. ولا أحضره ..
وصل مسج لدانه ..
((تعال .. اليوم .. أنتي وين أيي آخذج ((
طرشت دانه ((في بيت نايف .. معزومة ..ما أقدر أيي بكره أشوفك ((
وصل مسج ثاني (بمر بيت عمي خلال خمس دقايق أبي أشوفج))
دانه (( حمد .ما أقدر ام ضاحي وضاحي رجعوا من السفر ((
حمد (( مو مشكله بكلم ضاحي وبقوله جهزي عباتج ((
دانة ــ شفيه هذا ؟؟
قمر ــ من ؟؟
دانه ــ حمد .. ما أدري شفيه متحرقص .. يبي يي ويآخذني ..
قمر ــ كلميه في التلفون ..
دانه ــ صج والله .. ليش ما أكلمه .
دقت عليه .. لكن ما رد ..
دانه ــ لين ما يي .. يصير خير .. قمر .. نرجع .. لازم تحضرين .
قمر ــ دانه لاتحاولين . ماني حاضرة العرس .. وأحسن شي أنهم بيسافرون لمدة ست شهور ..
دانه ــ ست شهور ؟؟
قمر ــ اييه .. خالد يبي يكمل دراسته ويتخصص جراحة قلب .. في أمريكا .. وبدور وايد مستانسه .. أميركا .. her dream,
دانه ــ زين ما فكرت .. بعدين ؟؟ لما يرجعون من أمريكا .. زوج أختج .. لازم تكلمينه .. تسلمين عليه ..
قمر ــ دانه ,, لاتنسين .. الغلطة غلطته ..موب غلطتي ..وأنا بتصرف كأن ولا شي كان .
دانة ــ أتمنى تتحسن الأمور .. والقلوب تصفى .
دخل ضاحي شايل بيده عباة وشنطة دانه ،،
ــ حمد ينطرج برا ..
انصدمت دانه .. ياب شنطتها وعباتها لين عندها ؟؟
دانه ــ زين .
ضاحي ــ أنا بروح البيت بعد العشا .. .. خلي يوصلج لين هناك ..
دانه ــ انشاءالله ..
راح ضاحي للمجلس .
قمر ــ شفيكم تتكلمون جي كأن بينكم ثار ؟
دانه ــ مافي شي ..
ودخلت الدانه للصالة .. وكانت أم ضاحي موجوده ..
دانه ــ عمتي .. والله ما ودي أتركج بروحج ..بس ولد أخوي يبيني في موضوع .. بحاول ما بتأخر .. بس برجع لين هنا ..
أم ضاحي ــ الحين بنتي تيي .. ما بظل بروحي .. لاتخافين علي يا يمه .. روحي .. بحفظ الله ..
البست عباتها وطلعت ..
دخلت السيارة ــ ما بتنزل تسلم ؟
حمد ــ مشي هالمكياج من على ويهج يلا ..
دانه ــ انزل سلم على عمك وريل عمتك ..
حمد ــ لاحق .. الأيام جدامي وايد ..
طلعت دانه منديل مزيل للمكياج .. ومشت الروج والبلاشر وشوي من مكياج العيون .. ورتبته ببودر خفيف . وحطت غشوتها على وجهها ..
حرك حمد .. وطلع من البيت بسرعه ..
دانه ــ شوي شوي حمد .. ليش طاير ؟؟؟
حمد ــ ولد أخوج ..
دانه ــ عاد أي واحد ماشاء الله ما أكثرهم ..
حمد ــ من غيره ؟؟
حست دانه أنه يتكلم عن خالد ..
دانه ــ خالد ؟
التفت لها معصب .. بس تحس أن في زعل وايد في عيونه ..
دانه ــ قال لك ؟؟
حمد ــ اييه ..
سكتت .. لكنها ما قدرت تمسك دموعها ..
حمد ــ ليش ما قال من أول ؟
دانه ــ شتبيه يقول ؟ أنا مريض وأبي أموت ؟؟ شتبيه يقول ؟؟ وهو نفسه مو قادر يستوعب هالفكرة .
حمد ــ ........................ .. الغبي .. سألت الدكتور .. ويقول كل يوم .. يمر يمكن يشكل خطر عليه إذا ما تعالج ..
دانه ــ أدري .. قال لي موب زين له اذا تأخر . لكنه .. يبي يفرح أهله فيه .. ويتزوج ..
حمد ــ يا شين العذر ويا ويهه ... لما يطيب يرجع يتزوج ..
دانه ــ امل نجاح العملية .. 50% بس .. يعني يا إي .. يا لاء ..
حمد ـ ما أقدر أنطر أسبوعين .. خلي يسافر هالحين ..
دانه ــ حمد ..
حمد ــ شذنب خطيبته تترمل امبجر ؟؟
دانه ـ اسم الله على عمره فال الله ولا فالك ...يا حمار ..
حمد ــ ليش يخدعها ؟
دانه ــ هو ما خدعها .. هي رضت بكامل ارادتها .. هو قبل لا يتقدم لها .. طلب مني أسألها .. وهي وافقت ..
حمد ــ بس ..
دانه ـ حمد .. خالد ما قال لك .. إلا وهو محتاج مساعدتك .. أرجوك حمد .. نفذ له كل الي يبيه ..أرجوك ..
رجعت في الليل .. ودخلت غرفتها وقفلت الباب .. مطنشه ضاحي .. اللي كان بره .. يقرأ جريده ..
اليوم الثاني صحت من النوم .. ويوم طلعت من الغرفة .. لقت ورقة نوته على بابها ..
(سافرت بنغلاديش .. عندي شغل (
دانه ــ وايد عليك ..
دخلت الغرفة وصكت الباب قوة ..
******************
دانه ـ بخمسة وعشرين ألف دولار ؟؟ هذا ؟؟
بدور ــ اييه .. من شانيل ..
دانه ــ هذا ؟؟؟؟؟؟؟؟؟؟؟
كان فستان بدور ناااااااااعم .. تقريبا التطريز اللي فيه بسيط ..وجيبونه بسيط شوي .. والطرحة غريبه من الدانتيل الفرنسي .. تقريبا .. من النوعية اللي تلبسها الاميريكيات .. ظهره في اكسات بسيطة .. الكتفين مطرزين بدانتيل بسييييييييييط .. كان حلو.. بس ناعم واااايد .. .موب فستان عرس ... فستان سهرة وايد عليه ..
دانه ــ وايد حلو ,,
بدور ــ اخترته .. علشان بعد عشرين سنة تلبسه بنتي ..
ليلى ــ الظاهر يالبدور تشوفين أفلام أجنبية وايد .. نشوف بنتج إذا رضت تلبسه ولا لاء ..
عبير ــ ما تدرين .. يمكن بنتها تشوفه متكلف وايد .. وتشتري واحد أبسط منه بخمسين ألف دولار ...
ابتسموا البنات ...
البدور ــ كيفها .. تبي تلبسه ولا لاء .. بس أنا متأكده أني بلبسه كل شهر لخالد ..
دانه ــ ها يا عبير .. جهزتي الدخلة ..
عبير ــ اييه ... ييت أناديكم ..
بدور ـ أخيرا ..
دانه ــ شالموسيقى الغريبة اللي مختارتها ؟؟
بدور ــ موسيقى أحبها .. بس ها عبير .. لما يدخل خالد أغنية تونايت مالت ويست لايف اوكي ؟؟
عبير ــ انشاء الله ....
ضبطت نفسها البدور .. ووقفت عند الباب ..
دانه ــ تبين أساعدج ؟؟
بدور ــ أبي هاللحظة كاملة لي .. أنا بس .. الكاميرا تركز بس علي ..
ضاحي ما اتصل ولا قال متى يرجع.. دانه كانت لابسة فستان مشمشي .. وكان متداخل معاه ألوان وايد .. كان شكلها طالع وايد حلو وفاتحة شعرها على طولة.. ومنيرة راجعة شباب .. عشر سنوات أصغر .. الظاهر مسوية عمليات شد ومد ,,
قمر طلعت لها حجة غريبة علشان ما تحضر العرس ..
((اسهال شديد ..جرثومة ..!!!!!!!!! ((
بدور ما اعترضت .. حست الدانه أن بدور استانست وايد .. أن قمر ما تحضر .. ومحد يقدر يلوم أي وحده منهم ..
ليلى كانت واقفة حزينة.. لابسة فستان أسود ناعم .. وشعرها مرول .. وميكب بسيط ..
دانه ــ شفيج ؟؟
ليلى ــ الأسبوع اللي ياي أنا بكون بمكانها ..
دانه ــ وهالشي يخليج مكتئبه ؟؟
ليلى ــ بالعكس .. يخوفني .. شوفي البدور شلون واثقة من نفسها .. حتى ما أسألت أحد شكلي حلو ولا لاء .. لو أنا بمكانها .. كان شلت منظرة في يدي بس علشان أتأكد أن الكحل ما ساح من الدمع ..
دانه ــ لا تستعجلين على رزقج .. قريب بتعرفين ..
مر العرس هادي ... منيرة نقطت بنتها وهي فرحانة .. ولا كأن بنتها بتسافر بعد ساعات لمكان بعيد لمده بعيده ..ودانه .. شايل همها اكثر منها ...
*****************
خالد يبتسم لربعه .. اللي يتكلمون معاه وينكتون عليه ... أنه معرس ..
فارس ــ اي خالد .. بعد الليلة مابنشوفك لين ست شهور .. ؟ هذا أطول شهر عسل سمعت فيه صراحه ..
خالد ــ أحب أكون سباق للأمور ... الموضة اللي يايه شهر العسل برا البلاد لست شهور ..
حمد ــ الله يخليك .. تونا ما تزوجنا .. لاتروج لهالفكرة ..
فارس ــ يمكن هذا السبب الوحيد اللي يخليني أحمد الله أني تزوجت مبجر .. ولا .. أميركا ست شهور بتخليني مديون لين عشرين سنة جدام ..
خالد ــ عقبال الباقي ..
حمد وحسن ـ لا أرجوك ..شوف النسيب ..
خالد ــ أي نسيب ؟؟
حمد ــ ضاحي .. أبوه يا من زمان ..
خالد ما قدر يمنع نفسه من التنهد.. كان انسان واثق من نفسه .. ويهه فيه وسامة بسيطة .. بس موب مثل أول مرة شافه خالد .. كان مسنع العارض.. قبل كانت لحيته أطول وشواربه مسنعها ..
يا وسلم على خالد .. وعلى الشباب بعدين راح ويلس عند أبوه .. وسولف معاه شوي ..
بهرته بدور .. كانت طالعه حلوة وايد .. ببساطة ..
بعد ما قصوا الكيك .. وصوروا مع بعض .. اطلعوا للسويت اللي حاجزه نايف لبنته ..
الدانة ودعت البدور .. بعيد عن خالد .. خصوصا بعد آخر مسج منه ..
..
هدى ــ دانه ,,, ضاحي اتصل فيني وقال لي أنه ناطرج برا .. أنا بروح مع أمي ..
دانه ــ ضاحي رد من السفر ؟
هدى ـ اييه ..
طالعت دانه ليلى ..
ليلى ــ ............... روحي ..
دانه ــ بس .. ما ..
ليلى ــ أنا بروح مع الدريول .. ما عليج مني .. روحي لريلج ..
دانه ــ ............ ما أدري شلون بواجهه ؟؟
المعت دمعة في عيون الدانه ..
ــ تواجهين من ؟؟
كانت عبير تسأل دانه ..
دانه ابتسمت ــ محد .. كنا نتكلم عن خالد .. خطيب ليلى ..
عبير ــ دانه شفيج زعلانه ؟
دانه ــ ما في شي .. عن اذنكم ضاحي ينطر برا ..
اتصلت دانه بقمر ..
قمر ــ هلا .. خلص العرس ؟؟
دانه ــ تقريبا .. شلون الاسهال معاج ؟؟
قمر ــ قوي ..ههههههه...
حست الدانه أن قمر تصيح ..
دانه ــ زين .. بكلمج في الليل ..
قمر ــ ليش ؟؟
دانه ــ ضاحي ينطرني ..
قمر ــ متى يا من السفر ؟؟
دانه ــ ما أدري .. قبل العرس ماكان موجود .. متى ..
حست دانه أنها لو تكلمت ع ضاحي كأنه ما تعرف شي عنه ( وهي ما تعرف شي عنه (بتشك قمر .
دانه ــ كلمته أمس .. وقال لي ما بيرجع لين أسبوع .. باي ..
قمر ــ باي .
دخلت السيارة وصكت الباب بعصبية ..
ضاحي ــ وعليكم السلام .
لفت ويهها بعيد عنه ..
ضاحي ــ برنسيسه ديانا .. ليش معصبة .
قالها بطريقة احتقار وسخرية ..
لفت له الدانه .. وكانت عيونها مليانه دموع .. طالعت له بكره .. ولفت ويهها مرة ثانية .. وقالت ..
ــ بسببك.. صرت طول اليوم بس أكذب.. صرت أتنفس كذب بسببك.. كل اللي يسألني .. أكذب.. كل ما أتكلم أكذب ..حرام عليك .. حرام عليك ..
حطت غشوتها على ويهها ولفت ويهها ..ولا سمعت كلمة منه لين اوصلوا البيت نزلت بسرعه.. وراحت غرفتها وصكت الباب.. حذفت عباتها وارتمت على السرير.. ودموعها على ويهها أربع أربع .. فجأة تراكمت عليها الأحزان والهموم .. .. فتح الباب ..
ضاحي ــ دانه ..
رفعت نفسها الدانه .. وحاولت تمسح دموعها .. تلخطت يدينها بالكحل والشادو .. رجعت شعرها لورى ,,
دانه ــ ضاحي .. طلقني .. أرجوك .. الواضح أني ما أعجبك .. وأنا .. ما أقدر أتجمل زياده .. طلقني.. لو سمحت .. أنا تعبت .. تعبت ..
كانت نظرات ضاحي لها .. غريبة .. انهارت دانه في هالليلة ..
ضاحي ــ خلاص
انقبض قلب الدانه .. وطالعت له بخوف ورعب ..
*********************
خالد ــ بدور .. شفيج ؟؟
بدور ــ الكلبة الحمارة ..
خالد ــ من ؟؟
بدور ــ الكوافيرة حرقت لي شعري .. الحقيرة ..
خالد ــ ها ؟؟؟
بدور ــ خالد .. لحين تروح وتيب لي حمام زيت .. فاشكول .
خالد ــ ايش ؟؟ هي يا ميينونه .. من وين أييب لج حمام زيت الساعة وحده الصبح ..
بدور ــ مالي شغل .. ماني طالعة من هنا لين تيب لي حمام زيت فاشكول .. شعري صار جاف وايد ..
خالد ـ موب مشكلة .. بكرة آخذج للصالون .... بس يلا .. لاتحبسين نفسج داخل ..
بدور ــ والله ماني طالعة من هنا لين تيب لي فاشكول ..
خالد ــ انبوج من وين أييبه لج ؟؟
بدور ــ في صيدلية ولا كارفور ..
خالد ــ أنتي من صجج تبيني أروح كارفور ؟؟
بدور ــ فديتك يا خالد .. يا خالد .. شعري بيحترق اذا خليته جي الكلبة الكوافيرة ..
خالد ــ زين ..
نزل خالد وهو معصب من الفندق .. وهو يلعن اليوم اللي فكر فيه بالزواج يعني لازم تتسبح ؟؟ لازم ويا ويهها ؟؟
ومن أقرب صيدلية .. اشترى له واحد ..
ــ خذي ..
بدور ــ بس هذا موب فاشكول ..
خالد بعصبية ــ بدووووووور ..
بدور ــ خلاص ..يكفي ويوفي .. تسلم يا عمري ..
بعد ربع ساعة .. طلعت . وكان شكلها روعة .. شعرها كان مبلل .. نازل على ويهها نساه كل تعبه .. وعصبيته ,,
الحلقه الرابعه عشر
دانه ــ يعني ما صدقت تبي تطلقني ؟؟ خلاص ..
ضاحي صرخ فيها ــ أنت شتبين بالضبط ؟؟ أنا ما فهمت .. تبين الطلاق ؟ ولا ما تبينه ؟؟
دانه ــ أبي حل .. سواء كان بالطلاق ولاغيره ..
ضاحي صفق الباب وراه وطلع ..
ارجعت دانه وحذفت نفسها على السرير ..
((قلوبنا ما اجتمعت يوم حتى نزعل .. من عرفنا بعض عرفنا الفراق
حياتي وشبابي وأيام عمري تذبل .. وما بتضرنا زياده كلمة طلاق .. ((
ما بتترك السالفة تمر مرور الكرام .. طلعت من الغرفة يوم اوصلت الغرفة ..
((حبيبتي . .. (( وضحك ,,
احتبست الدموع أكثر في عيون الدانه .. ودخلت لغرفتها وصكت الباب بقوة.. رسالة منها لضاحي .. أنها اسمعته.. وانهارت تبجي لين نامت بدموعها ..
صحت الصبح .. وهي دايخة .. ما تدري شصاير لها ..
خذت ثواني يلا تذكرت ..بس هي ما نامت بهالوضعية.. من غطاها ؟؟ والدنيا حر موب برد؟؟ لحظة من فتح التكييف؟؟
طلعت برا الغرفة بعد ما تأكدت أن شكلها مضبوط مع ان الكحل .. ملطخ ويهها ويدينها ..
ما كان ضاحي موجود .. رجعت الغرفة خذت لها دش سريع .
(حرام عليه .. حرام عليه.. يالله انهرت خلال شهر من زواجي مع أني ما شفته إلا يومين بس!!ان ما كانوا ثلاث من يوم تزوجته لين اليوم .. (
**
(صباح الخير (
قالت له البدور وهي تبتسم .
خالد- صباح النور .
كانت كشخت لبست بدله وايد حلوة وسوت شعرها تسريحه ناعمه وويه طالع منور .
خالد – طالعه تهبلين شالحلاة كلها؟
بدور – عيونك الحلوة يلا بدل ملابسك علشان نروح بيتكم.
خالد-ليش كم الساعه؟
بدور – عشر ونص ....
خالد- كنا تاخرنا؟
بدور – امي اتصلت فيني من ساعه وقالت تعالوا قبل آذان الظهر .
قام خالد وهو يطالع بدور بحب كانت صج روعه والاحلى انها ماصحته من النوم ولا حس فيها مع ان نومه خفيف..
خالد – زين يالبدر ماقلتي لي تريقتي ولا لا؟
البدور – شلون اتريق بدونك يا عيوني ؟
خالد – تسلم عيونج... شكلج وايد روعة ..
البدور ـ عجبتك صج؟
خالد ـ تهبلين ..
البدور ـ وصيت على الريوق .. وورد ..
انصدم خالد من البدور .. ماكانت سيئة بالمرة.. بالعكس .. حس أنها راقية .. رغم أنها مدللة ولا تعرف شيء غير السوق وهالخرابيط ..
البدور ـ حبيبي لاتنسى أنك نمت أمس بلا عشا ..
تذكر خالد سالفة حمام الزيت عقد حواجبه .. ضحكت بدور .. وفهمت اللي في باله ..
بدور ـ مستحيل في أول ليله بينا أطلع لك بشعر جاف متقصف ومحترق .. ارجوك خالد .. لاتمسكها علي حجة ..
ضحك خالد ..
ـ خلاص .. بنسى ..
وصل الريوق ووصل الورد .. انتعش خالد بدش سريع .. وبريحة الورد ومنظره .. كان الورد لونه مشمشي وفيه ورد الربيع الأبيض .. .. يمشي لونه مع بدلة البدور المشمشية والأنيقة ..
********
البست بدلة خضرا غامجه.. وحطت مكياج خفيف وأخذت الشيله الدانتيل البيضا .. من بيآخذها لقمر؟؟
طلعت مرة ثانية .. وما كان ضاحي موجود .. اطلعت للبنات .. مالقتهم في غرفتهم ..
ـ دونا دونا ..
يات الخدامة الفلبينيه ..
دونا ـ يس مدام؟
ـ وين البنات؟
دونا ـ قو ..لييف..
دانه ـ زين ... في حد من السواقين هنا؟؟ راجو ؟؟ عبدالرزاق ؟؟كومارور ؟؟ شوفير ؟؟
دونا ـ مافي مدام ..يروح يجيب أغراض ..ليف اوي ..
البست دانه عباتها وطلعت عند السيارات مالقت إلا سيارة وحده وهي سيارة فيصل .. اكتئبت .. اتصلت بضاحي لكنه مصكر جواله .. رجعت للطابق الثاني وتمت تنطر ..
*************
خالد ـ يلا ؟
بدور ـ حاضر.. طلعت البدور وهي لابسة عبايتها وحاطة الشيلة بطريقة مستهترة على كتوفها ..
خالد ـ بتطلعين جي؟
بدور ـ ايي .. ليه ؟؟
خالد ـ البسي شيلتج عدل ورديها على ويهج ..
بدور ـ لا خالد لاتقول لي انك منهم .. حرام عليك ..
خالد ـ بدور .. من من ؟؟
بدور ـ أنا حلوة مافي شي يخليك تستحي أني أمشي جنبك؟
خالد ـ بدور .. السالفة موب سالفة مستحى منج.. أنا ما أحب الشباب ولا الناس يشوفون ويهه زوجتي .. وأنا أخواتي كلهم يتغطون .. وأبي زوجتي تتغطى ..
بدور ـ انزين .. ردت الشيلة على ويهها بعد ما ضبطت الشيلة ..
طلعوا من الفندق ..
بدور ـ متى بنسافر؟
خالد ـ اليوم المغرب انشاء الله . أسبوعين شهر عسل وبعدين ببدأ دوامي .
بدور ـ يعني مابدخل لا جامعه ولا معهد ؟؟
خالد ـ تقريبا ..
بدور ـ موب مشكله المهم راحتك انت .. وخليني أشبع من أمريكا .. خلصت تأشيرتنا وجوازاتنا؟
خالد ـ اييه ؟؟ أنا وأنت ابكرة نكون في امريكا .
بدور ـ لاتنسى سيلينا ..
خالد ـ من سيلينا؟
بدور ـ خدامتي .. لاتقول أنك نسيت تسوي لها تأشيره .
خالد ـ أصلا ما أدري أنها بتروح معانا !
بدور ـ لاياخالد .. ما أقدر أستغني عن سيلينا .. هي الخدامة الوحيده اللي صج تريحني ..
خالد ـ لارحت هناك بيب لج خدامة ..
بدور ـ .......
خالد ـ خلاص .. بنوصل بعد عشر دقايق لبيت أهلي .. تبين بداييتها تكون زعل ونكد ؟
بدور ـ خلاص .. مابزعل .. حط شي اغنية أو ..أي شي ؟؟
حط خالد اغنية لراشد الماجد ...استانست عليها البدور ..
*************
بعد نص ساعة من النطرة ملت ... وتعبت . اتصلت في حمد ولقته في شغله.. واتصلت في حسن ولقته في الجامعه هو وسلمان ..وخالد في شغله .. تمت في حيره .. أخوانها هالحين أكيد في بيت ناصر .. بيت خالهم ..
ـ شتسوين هنا؟
التفت الدانه لفيصل ..آخر شخص تبي تشوفه في هالبيت ..
دانه ـ ناطره حد من السواقين يآخذني ..
فيصل ـ وين ؟
دانه ـ بيت نايف أخوي .
اكتمت دانه نفسها .. تحاول تخفف اضطرابها وخوفها من هالانسان السوق اللي حتىما اعتذر من آخر موقف صار بينهم ..
فيصل
ـ أوصلج؟
حست دانه بشعر جسمها وقف .. فيصل يوصلني؟؟ وشفيها حماي .. بس .. لا . يمكن .. طالعت له الدانه مضطربه وخايفه ـ اوكي ..
كانت تبي تيلس ورى .. لكنه فتح الباب اللي جدام بس ..
فيصل ـ صراحه .. ماتوقعت ضاحي يرضى يتزوج.. بس لما شفتج ,, صراحه عذرته ,,
ماعرفت الدانه شتقول . فظلت ساكته ..
فيصل ـ بتمرين قمر ؟
دانه ـ اييه ..
فيصل ـ زين .. هذي أول مرة تركبين معاي ما بتشربين فيها عصير جاي ؟؟
دانه ـ ليش داخله بيتك ولا سيارتك ؟
فيصل ـ لا بس القصد نعزمج على شي .. نمر مندرين نشرب عصير؟
دانه ـ مندرين بعيد وأنا ما أشتهي شي ..بس مشكور على كل حال .. ليش سرعتك ثمانين ؟؟ أنا مستعيله لازم أروح بيت خالي بعد ما أطلع من قمر .
فيصل ـ تبين أوصلج؟
دانه ـ لا مشكور . بروح مع قمر ..
حط فيصل أغاني مو طبيعيه .. ما عجبت دانه نصها ريمكسات أجنبية مزعجه تدوخ .. ونصها آغاني لخالد وايد رومانسية.. ما أعجبتها ..
فجأة الصقت دانه على الباب مثل زيهوي .. مد فيصل يده وكان يبي يفتح الدرج اللي جدامها بحجة يدور شي .
فيصل ـ ليش خايفه مني ؟
دانه ـ لا .. بس .. جفلت .
أخذ فيصل عطره من الدرج .. ورش على ثيابه بطريقه عشوائية .. وحاش الدانه من عطره اللي كان صج مركز .. ويخنق ..
فيصل ـ تبين عطر ؟
دانه( اوريدي ترستني عطر ) ـ لا..
وكانت لازقة في الباب .. بعيد عنه.. وهي موب مرتاحه بالمرة .. راجو سواقها من يوديه في مطاريش بدون ما تدري ؟؟ وليش ؟
فيصل ـ وصلنا بيت قمر ..
نزلت دانه بسرعه من السياره وقالت شكرا .. أول ما ادخلت شافت قمر في الصاله ..
دانه ـ اسلام ..
قمر ـ هلا عمة ..
وسلمت عليها وكانت شايله بيدها قلاس نسكافيه ورافعه شعرها بطريقه مبهدله .نصه منسدل ونصه مرتفع بدون تسريح.. ولابسه بجامة بيضا واسعه عليها .. ما تعودت دانه تشوف قمر بهالبهدله .. تعودت عليها في قمة بهدلتها تكون مسرحه شعرها ولابسه بيجامه حرير حلوه ..
قمر ـ عمتي ؟؟ شالعطر الرجالي المركز؟؟ أكيد خالي ضاحي سلفج اياه ...هههه
دانه ـ لا والله .. هذا خالج فيصل اليوم وصلني ورش لعمره عطر وحاشني طشار منه ..
قمر ـ العطر مركز ..
دانه ـ أدري .. يخنق .. وين خدامتج..
قمر ـ في المطبخ ليش؟
دانه ـ تآخذ عباتي وشيلتي وتغسلهم من هالعطر .. على ما تجهزين .
قمر ـ أجهز؟
دانه ـ بنروح نودع البدور وخالد .. وهشش .وبدون كلام ..
قمر ـ أنا قلت لمي اني تعبانه .. وماني رايحه ..
دانه ـ يالخبول .. عرس أختج الوحيده وفوتيه ..
قمر ـ وهي مستانسه .. خلاص .
دانه ـ نادي خدامتج..
قمر ـ سيلينا .. سيلينا ..
يات الخدامه من المطبخ .. وقالت لها دانه تغسل عباتها وشيلتها وتكويهم ..
قمر ـ أسلفج عباة من عندي ..
دانه ـ يستحب صراحه .. عطر خالج يدوخ الراس .. وموب عاجبني ..
قمر ـ زين .. ألبس أحسن ماعندي وأكشخ؟
دانه ـ .. تصرفي مثل طبيعتج .. أنت الصبح تحطين مكياج خفيف مع بدله بسيطه .. أو أنيقة ..
قمر ـ عمتي .. شسوي لا شفته ؟؟
ضحكت دانه ..
قمر ـ ليش تضحكين؟
دانه ـ أنتي من صجج؟؟ كم مرة شفتيه مرة ؟؟ مرتين ؟؟ وهو أصلا مايفرق بينج وبين أختج ؟؟ سلمي عليه عادي .. وكأن مافي شي .. لاتدمرين كرامتج بنظراتج الذايبة وكلامج المعسول ..
قمر ـ آآآآآه ياعمتي .. صج ماشفته إلا مرتين .. بس كنت أفكر فيه كل ليله .. كل ليله . كل لحظة .. كل ثانية ...
دانه ــ من هاللحظة .. اعتبري أن ماشي صاير .. ببساطة .. انسي ..
طالعت قمر عمتها.. وهزت راسها موافقة ..
*****************
نايف ـ خالد ..يالنسيب .. ما أوصيك على بنتي ..
خالد ـ مايحتاج توصيه ..
ضاحي ـ وين هي البدور ؟؟ بكلمها ..
خالد ـ داخل ..خل دانه تسووي لك درب ..
ضاحي ـ دانه مايات.. يمكن تيي بعد شوي .
خالد انتبه لارتباك ضاحي .. وقال ــ الحين اناديها لك ..
استغرب خالد.. ليش دانه ما يات؟؟ وطلع من الديوانية دخل الصالة وكان متأكد أن محد موجود وأن الحريم في صالة الحريم .. دخلت دانه وقمر الصاله ..
دانه ـ السلام عليكم .
خالد ـ وعليكم السلام..
طالع خالد قمر .. اللي ماكانت مغطية ويهها .. واشتبه لحظة بإنها بدور .. بس تذكر أن بدور داخل ..
قمر ـ شلونك خالد؟
طبعا خالد كان شوي مرتبك من الشبه بين البنتين .. طالع اللي مغطية ويها .. ـ بخير ..
نزلت دانه غشوتها عن ويهها ..وفي هللحظة رف قلب خالد .. ونزل راسه على طول .
ـ شخبارج يالدانه؟
دانه ـ الحمدالله .. شخبارك أنت ؟؟
خالد ـ الحمدالله .. داانه.. ريلج يبي يشوف بدور ويسلم عليها .. ناديها لين هنا .. ماعليج أمر ..
اضطربت دانه .. ضاحي هنا؟؟
دانه ـ انزين .. يلا قمر ..
سحبت دانه قمر بطريقه خفيفه .. وسحبتها لين الممر ودخلوا صالة الحريم .. سلموا على الكل .. ومالقوا بدور ..
دانه ـ وين بدور ؟؟
عايشه ـ في غرفتها تستريح ..
مسكت دانه قمر وسحبتها فوق لازم تسلم على بدور ..
دانه ـ امسكي نفسج ..
قمر ـ زين ..
كان ويهه قمر مخطوف .. وباين أنها مرتبكه ..
دانه ـ تشييز ..
قمر ـ تشييز ..
دخلوا لبدور بعد ما طقوا الباب ..
بثواني كنها سنين .. سلمت قمر على بدور وباركت لها وطلعت بحجة انها تعبانه ومريضه ..
طلعت دانه وراها على طول ..
دانه ـ وين رايحه ؟
قمر ـ دام خالي ضاحي هنا أنا برجع البيت .. بحجة أني مريضه .. مع السلامة .
كان واضح هروب قمر للدانه .. اللي ماخلت دانه حتى ترد عليها .
رجعت دانه لبدور ..
دانه ـ ها .. شلون خالد معاج ؟
بدور ـ عجيب .. واو . صج فارس الأحلام .. الوسامه واللباقه والرزة والمنصب ..وأمريكا .. وين قمر ؟
دانه ـ راحت البيت .
بدور ـ توقعت .. ما أدري ليش تكرهني ..
دانه ـ لا .. قمر ماتكرهج هذي أختج .
بدور ـ الا .. من الثانوية وهي باطه جبدي .. تبي تستقل عني قالت ايش ما تحب طريقتي وستايلي .. ويوم اشتريت فستاني طالعتني باشمئزاز ولا علقت ,,
دانه ـ بدور .. لاتحطين هالفكرة في مخج .. قمر تموت عليج .. والدليل أنها مرضت لانج بتبتعدين عنها .. وبتصير بروحها ..
بدور ـ تهقين ؟؟
هزت دانه راسها وهي تبارك حق عمرها لموهبة التمثيل الفظيعه اللي صارت تتقنها وهالكذب اللي صار سهل على لسانها مع أنها ماكانت تكذب في حياتها !!
بدور ـ عمتي رغم أنج كنت دايم ترددين أنج تكرهين خالد .. بس كرهج هذا ماله داعي .. خالد وايد حبوب ..
دانه ـ صج؟؟ اووه .. نسيت ..
بدور ـ شنسيتي؟
دانه ـ ضاحي يبي يشوفج تحت في الصاله العوده .. وخذي ..
عطتها دانه علبة مجوهرات فيها اسوارة من الذهب الأبيض والياقوت .. اشترتها كهدية زواج لبدور من أسبوعين ..
بدور ـ تينن .. روعه .. عمتي ليش كلفتي على عمرج ؟؟
دانه ـ تستاهلين .. والحين يلا خالج ناطرج تحت ..
بدور ـ تعالي معاي .. بستحي ..منه ..
ضحكت دانه ..
بدور ـ ليش تضحكين؟
دانه ـ توني أدري أن للحين فيج شوي مستحى ..
بدور ـ لاتخافين هذي نقطه أحتفظ فيها لوقت اللزوم .. يلا .. تعالي ,,
كانت الدانه محتارة شتقول لضاحي ؟؟ بعد ليلة أمس السخيفة ..
*************************
كان خالد مختبص وهو جالس بين ربعه وهله .. صورة دانه خلته يرتجف .. ماحس بشي تجاه قمر .. لكن ليش قلبه قبض لما شاف الدانه ؟؟
ضاحي ـ من رجعت لين هالحين ماتكلمت .. ها .. فضيت الدرب ؟؟
خالد ـ بتناديها دانه ..
ضاحي ـ دانه ؟؟ هي يات ؟
خالد ـ اييه ..تو دخلت مع قمر .
سكت ضاحي شوي ..
رن تلفون خالد .. ورد ..
بدور ـ حبيبي وين خالي ؟
خالد ـ الحين بيدخل ..مع السلامة .
صكر من بدور والتفت لضاحي ..
ـ روح للصالة اللي داخل على طول ..
حس خالد أن ضاحي متردد .. لكن احساسه خيبه لان ضاحي قام على طول ودخل الصاله .
طبعا دانه اضطربت لما دخل ضاحي وسلم وكان طبيعي ..
ضاحي ـ شلونج يالبدور شحالج ؟؟
بدور ـ بخير يا خالي .. وأنت شخبارك ؟؟
ضاحي ـ الحمدالله .
حست الدانه أنه بدور لايقة لخالد تماما .. الإثنين من الصنف الأناني .. اللي ما يفكر إلا في مصلحته . وما يهمه إلا نفسه .. طالعتها وهي تتكلم مع ضاحي .. صدمها أن بدور وضاحي علاقتهم ممتازة مع بعض .. تذكرت عيال أخوانها وابتسمت .. تذكرتهم واشتاقت لهم .. تذكرت أياام عرسها .. يوم عرضوا عليها مساعداتهم ..
(صج حمير اشتقت لهم .. ما يسألون الحمير .(
بدور ـ خالي .. كافي عمتي أهدتني هديه ليه كلف على عمرك؟؟
ضاحي ـ لا .. أي تكليف .. بنت أختي وتستاهلين .. وموب كليوم تعرسين .
التفت دانه لضاحي اللي قال لها ..
ـ يلا دانه نروح ؟؟
بدور ـ وين رايحيين عمتي وين رايحين خالي ؟؟ أنا محتاجه لعمتي اليوم .. تعال وخذها المغرب بكون سافرت ..
دانه ـ وريلج يالفالحه وين بتحطينه بينحرج من وجودي ..
بدور ـ موب ذيك المرة ظليتي شهر هنا ؟؟ ما أشوفه انحرج ؟؟
ماحبت الدانه نظرات ضاحي ..
ـ ماكان في البيت .. كان في الشغل لين آخر الليل وأنا في المدرسة طول اليوم.. الوضع غير .. بعدين توكم عرسان ..
قامت دانه وخذت شنطتها ..
ضاحي ـ موب مشكله .. دانه خلج هنا برجع بعد ساعتين وآخذج ..
ماحبت دانه نبرة ضاحي ..
بدور ـ تسلم لي يا خالي ..
وباسته على خده بقوة ..
طلع ضاحي ودانه كانت معصبه ..
بدور ـ شفيج ؟؟
دانه ـ ولا شي .. نروح نيلس ويا الحريم ؟؟
بدور ـ وش نسوي مع العياييز ؟؟ تعالي غرفتي ..
طول ساعه ودانه تسمع هذرة البدور عن العرس وكأنها موب موجوده وعن خالد الجنتلمان ووالوسيم ..
بدور ـ عمتي تدرين الكوافيره الحماره ليش حرقت شعري ؟
دانه ـ يمكن لأنج أمس كنت صج لئيمة معاها ..
بدور ـ حماره ما تفهم شسوي لها ؟؟
دانه ـ في أسلوب للتعامل .. حتى لو كانت فلبينيه حمارة مثل سيلينا .
بدور ـ حتى أنتي تقولين عن سيلينا حمارة .. فشرايج في هذيك الكوافيرة السخيفة ؟؟
دانه ـ والله أنا وأنتي مال يندرى نهايتنا شلون .. أمهات المستقبل ..
بدور ـ وناسه .. تزوجنا مبجر أنا وأنتي ومايفصلنا أقل من شهر .. وبتتزوج ليلى من خالد .. بعد أقل من أسبوع .. خسارة ما بحضر عرسها .
دانه ـ المفروض تجي اليوم . ما أدري ليش أبطت ..
**************************
رجعت الدانه مع منى وبناتها .. مع الدريول .. بعد ما نساها ضاحي أكثر من أربع ساعات .. ودعت فيهم البدور ..
عايشه ـ وناسه خوات خالد .. العنود وعبير .. صج حبوبات ..
هدى ـ حسافه أن عبير بتتزوج .. وإلا خطبناها لفيصلوه علشان تسنعه ..
منى ـ بس يا بنات .. عن هالكلام الفاضي اللي لايودي ولا ييب ..
هدى ـ دانه .. بتسافرين مع ضاحي ؟
دانه ـ لاء .. من قال ؟؟
هدى ـ سمعت ضاحي يقول كلام ..
دانه ـ بس أنا عندي دوام في الجامعه .. ولا نسيتوا ..
عايشه ـ غريبه .. مع أن ضاحي اليوم الصبح ذكر شي عن سفركم ..
لا ياربي .. آخر شي أبيه .. مشكله جديده مع ضاحي ..
دخلت البيت على طول .. وعلى طول لغرفتها ..
فتحت الباب وكان ضاحي يالس يقرأ جريده ..
دانه ـ السلام عليكم .
ـ وعليكم ..
دانه ـ وين بنسافر ؟
ـ ..................
دانه ـ أنا بدخل الجامعة . ما بقدر أسافر ..
ضاحي (يتأفف ) ـ شوفي دانه أنا مليت من هالحال ..
دانه ـ أنا الي مليت من هالحال .. كله بره ومسافر ..
ضاحي بعصبية ..
ـ شقـصدج ؟؟ أنت لين هالحين مصرة على الطلاق ؟؟
دانه بتعب ..
ـ ما عرفت صراحه.. ضاحي دامك ما تبيني ليش تزوجتني ؟؟ ليش عايش في هالمسرحية السخيفة ؟؟ دامني ما أعجبك طلقني ..
ضاحي ـ ومن قال أنج .................
دانه بعصبية ـ زين ليش عايفني ؟؟ ليش ؟؟
ضاحي ـ ما أدري من اللي عايف من .. ما أدري من اللي نام يوم العرس .. وما أدري من اللي يقفل باب غرفته كل ليله ..
دانه ـ حرام عليك أنا ما شفتك إلا ثلاث أيام؟ أنت حتى كلمة طيبة ما تكلمني.. أصحى الصبح وألاقي نوته على الباب.. كأنك ملزوم فيني غصب ..
دخلت دانه غرفتها وهي غرقانه بدموعها .. ملت من شعور المنبوذ اللي تمر فيه .. قطت شيلتها على السرير ومسحت المكياج اللي على ويهها .. ودخلت تتسبح.. على الأقل في تقدم .. في مصارحه ..
وبعد ساعتين, كسرت كل شيء لقته جدامها .. وطالعت النوته اللي في يدها (( بسافر برجع بعد شهر ((
كرهت هالحياة اللي عايشتها .. وحلفت أول ما يي بتطلب منه الطلاق .
************************
كانت فرحانه صج .. كانت صج مستانسه .. شافها وهي تناقز يمين وشمال .. في المجمعات ..وتشتري كل شي يعجبها ولا هامها هالفلوس اللي تعب فيهاا ..
خالد ـ بدور .. خل نطلع من هالمولات قبل لا أفلس ..
بدور ـ حرام خالد .. خل نستانس ..
خالد ـ عمري .. صار لنا أسبوع هنا .. وأكثر شي سويناه هو الحواطه في المولات .. ماتعبتي ؟؟ جدامنا ست شهور .. لا تملين بسرعه ..
بدور ـ أميركا تنمل وبسرعه ؟؟ مستحييييل أغرب الأشياء موجوده هنا .. تعال نتمشى ..
خالد ـ تعبت من جو المدينه .. وقبل لاتبدأ دراستي . خل نتمشى في الأرياف وعلى البحر ..
بدور ـ نترك هالحضارة ونروح للمستنقعات .؟؟ نو واي ..
خالد ـ زين أنا ريولي تعبت .. نروح ندور لنا مطعم نآكل فيه ..
بدور ـ زين .. بس نرجع بعدين ..
خالد ـ امشي .. وليش ما تلبسين الحجاب ؟؟ ليسه مخليته كنه شال ؟
بدور ـ خالد .. إذا لبسته الكل يبحلق فيني .. أنا حاطته على راسي .. وهذا كافي ..
عصب خالد .. بدور الظاهر ما عندها أي التزام .. بس كان يحبها .. أي يحب البدور .. كانت تسليه وايد وتضحك دايم معاه .. وتفهمه بسرعه مايحتاج مدرسين علشان يشرح لها موقفه .. (والا كانت تتظاهر أنها تفهم وهي ماتعرف شالسالفه .. بس هالشي بعد حلو (
خالد ـ وين غبتي ؟؟
بدور ـ كنت أتفرج على هالبوت .. عاجبني وايد ..
خالد ـ تعالي أعتقد اشتريتي ثلاث منه .. امشي المطعم موب بعيد ..
تمشوا في الشوارع الزحمة ...كانت ماسكه يده وتبتسم ..
خالد ـ شمناسبة هالابتسامة ؟؟
بدور ـ بس .. مستانسه ..كان حلم حياتي أيي هنا أامريكا .. وأتمشى فيها وأنا فرحانه ..
خالد ـ زين .. على الأقل أنج مستانسه ..
بدور ـ ما كنت أتخيل أني أتزوج بهالسرعة ..
خالد ـ صحيح ؟؟
بدور ـ خالد لاتسكت ...أرجوك .. ما تلاحظ أني أنا كله أتكلم؟
خالد ـ شتبيني أقول ..
بدور ـ تكلم عن كل شي .. كل شي .. شيعجبك من مايعجبك ششعورك ؟؟ شتفكر فيه ؟؟ شودك تسوي ؟؟ لاتسكت ..
خالد ـ حاليا ريولي تعورني والمطعم بعيد ..
بدور ـ شرايك نروح مكدونالد؟
خالد ـ ما أحب أكل مكدونالد ..
بدور ـ بيتزا .. في بيتزا للنباتيين .. وأنا أحبها ..
خالد ـ وين هاذي؟
بدور ـ ما أدري .. ههههههههههه ..
خالد ـ قربنا من المطعم .. امشي نآكل ..
بدور ـ اعجبتك ملابسي؟
خالد ـ وايد حلوة ,,حبيت الجاكيتات اللي اشتريتيها ..
بدور ـ صج؟ توقعتك تكرهها ..
طالع خالد بدور اللي كانت مطلعه شي من شعرها على ويهها وصابغته بلون فاتح وايد .. ولابسه جاكيت طويل بيج تحته تنورة طويله وبوت بني ..ولابسه نظارة بيجيه ..
خالد ـ شفيج على البيج كل شي لابسته بيج؟
بدور ـ احب هاللون .. حلو علي ...
كان حلو عليها خصوصا ان بشرتها قمحيه ...وماشيه مع اللون ..
***********
رن التلفون عند رآسها ..
ـ ألو ..
قمر ـ هاي ..
دانه ـ أهلين ..
قمر ـ عمتي بتروحين الليلة ليلة الحنا ؟؟
دانه ـ اييه ..
قمر ـ أمرج .
دانه ـ لا ..
قمر ـ اوكي ..
ليلى االليلة بتتحنى ,, حست الدانه بضيج ..لانها ماطلعت من غرفتها طول هالاسبوع الا لحظات بسيطه ..
شافت ويهها في المنظرة ..هالهالات السود حول عيونها وهالتعب اللي مبين في ويهها ..
حطت شوي باودر .. وشوي كحل .. وطلعت لابسه عباتها من الغرفة .. لبيت ليلى .. .تذكرت خالد ولد اخوها.. لما شافتها آخر مرة يوم العرس .. كان صج شكله تعبان .. هانت ... بكره يسافرون برا .. ويكمل علاجه ..
رن تلفونها ..
حمد ـ عمتي .
دانه ـ هلا حمد ..
حمد ـ وين أنتي الحين ؟
دانه ـ انا في الهلتون .. وين يعني بروح ليلة الحنا ..
حمد ـ زين أنا متضايق .. وين أروح ؟؟
دانه ـ حمد .. حبيبي .. اطلع وتمشا .. حط بالك على عمرك . .. هذا عرس أخوك ..
حمد ـ دانه .. شقول لبوي ؟؟ عن سفري بكره ؟
دانه ـ لاتسافر بكره .. سافر اللي بعده..
حمد ـ أنا ما حجزت لين هالحين .. شكلي بروح بعدهم بيومين ..
دانه ـ حل مناسب .. شخبارك؟
حمد ـ توني قلت لج كل شي .. تبيني أعيد ؟؟
دانه ـ وحسن وينه ؟؟ وصالح ومشعل وسلمان ؟؟ وين هالشيوخ ؟
حمد ـ قبل كانت الشقة هي اللي تجمعنا .. الحين .. كل واحد مادري عن الثاني ..
دانه ـ وبوك شخباره ؟
حمد ـ يسأل عنج .. يقول أسبوعين ما شافج ..
دانه ـ انشاء الله أشوفه باجر . تآمر على شي ؟؟
حمد ـ لاسلامتج . مع السلامة .
حست الدانه بضيق حمد.. وزاد ضيقها زياده .. هالأسبوع ..بالنسبة لها كان حجيم من المعاناة النفسية .. كانت شايله هم خالد وليلى .. وشايله هم ضاحي وهي ..وتتهرب من أسئلة قمر الكثيرة .. وزادها هالحين المسكين حمد .. المسكين .. شكله ضايق صج..
******************
بدور ـ الأكل عجيب .........
خالد ـ أول مرة يعجبج الأكل .. ماعجبج أول الأيام ..
بدور ـ شوف هالبنت .. تقريبا موب لابسه ثوب ..
خالد ـ ما أحب أتفرج ..
بدور ـ اييه .. حبيبي .. كون جي دايم .. لاتناظر البنات .. وأنا كنت أقص عليك .. مافي أي بنت جيه ..
خالد ـ أدري .. لأن هالمطعم راقي .. ومايدخل إلا ببدله رسمية وملابس محترمة لليدي ..
ضحكت بدور ..
ـ والله أنك موب هين ..
خالد ـ متى بنطلع من الفندق ؟؟
بدور ـ متى ما تبي ..
خالد ـ شي واحد يخليني متعاجز .. شنطج الكثيرة ..
ضحكت بدور ـ حنا هنا لست شهور موب ليومين .. هذي الأشياء كلها بحتاجها ..
خالد ـ بس أنا بلتزم بدراستي .. وبننحبس في البيت طول الوقت .
بدور ـ حشى مصري ..
خالد ـ صدقيني يا بدور .. أنا من النوع اللي لامسكت وركزت في كتاب ما أهده لو انطبقت الدنيا على الأرض ..ولا شلون برايج صرت طبيب ؟؟
بدور ـ لاتقول .. بننحبس في البيت ؟؟
خالد ـ لا .. مو دايم . أوعدج أني أحاول أفضى لج دايم ..
بدور ـ بكره ..بكره هو ؟؟ أييه بكره عرس ولد عمي خالد ..
خالد ـ ولد ناصر ؟
بدور ـ اييه.. كان ودي أحضر أشوف زوجته .. كانت معانا في المدرسة .. تصدق أنا وعمتي وولد عمي في نفس السنة تزوجنا ؟؟ وووووووناسه ..
خالد ـ اييه ..
بدور ـ خالد .. متى بتقول لي كلام حب ؟؟
خالد ـ لما أتعلمه وأحفظه .. هههههههههه ..
ماعجب بدور هالكلام ـ ما أدري ليش يتخيل لي دايم أني أرمي نفسي عليك .. أحس أني .. جليلة حيا ..
ابتسم خالد ـ واي أنتي .. ههههههههههه
ابتسمت بدور ..
***********************
ليلى ـ يا عمري .. يالدانه ..
الدانه ـ يعني أتخيله هالحين وأنا في قمة أحزاني مع حبيبته ولا زوجته يستانس عندها وحاذفني هنا ولا كرسي قديم .. ولا طاوله مالها داعي ..
ليلى ـ هدي يالدانه .. هدي أعصابج .
دانه ـ ما أقدر .. خلاص كل شي تراكم كل شي صار أسود.. ما أقدر أتنفس .. قلبي مهموم بخالد .. وعمليته.. وأفكاري ..كلها لو رجع ضاحي وطلقني.. وين أروح؟ بيت مين ؟؟ بيت تايف مستحيل .. أنا طالعه من هناك مطروده.. واذا طلقني اخوها بتزيد الكراهيه .. بيت ناصر .. ناصر بس يسمع كلمة طلاق يشوتني برا ويتبرى مني .. سعود ولا ثامر ؟؟ اذا وجودهم في حياتي عدم .. شلون بكون في حياتهم ؟؟
انهارت الدانه بدموعها ..
ليلى حضنتها .. وحاولت تهديها ..
ليلى ـ آآآآآآه يالدانه . ..يا قلبي .. شكثر تعانين ولاحد حاس فيج ..
دانه ـ أدري أن هذا ليله الحنا .. بس ماقدرت يا ليلى أكتم اللي في قلبي ..
ليلى ـ أي ليله حنا الله يهداج ..أنا وأنتي نعرف زين اللي في القلوب .. نعرف بالضبط اللي بنواجهه بكره من مصايب ..ومشاكل .. بس انتي حافظي على دعائج لله .. ان تنفرج كل هالمآسي ..
ماقدرت دانه تمسك دموعها أكثر .. وانهارت في حضن ليلىة الي كانت ماسكه عمرها .. بس انهارتن هي الثانية .. وتموا يبجون خوف من امستقبل مظلم جدامهم .
كانت ليلى محتاجة تفرغ اللي في قلبها من دموع علشان ما تتراكم وراها دموع أقوى ..
رجعت دانه للبيت بعد ليلة الحنا وهي مهمومة .. وكملت دموعها .. على مخدتها .. ما قدرت تكتم .. طول الليل تبجي .. قامت وتوضت وصلت ركعتين وتمت تدعي الله أن يفرج كربتها ويقوم خالد بالسلامة ..
تقريبا الليل كله كانت تدعي وتصيح ..
******************
كانت لابسه فستان أسود .. ومكياج خفيف .. ورفعت شعرها في تسريحه بسيطه ..
كانت الأغاني تدور .. والبنات مسوين عروض تحدي بين بعض ..
ما يات ليلى لين هالحين .. كانت دانه يالسه على الطاولة المخصصة للأهل وهي تنتظر .. كان ودها تشوف خالد.. لكنه طلع من الصبح .. كانت قمر بأحلى طلة ..وبنات ناصر الصغار ماشاء الله عليهم لهم نصيب في الجمال .. كانت دانه ماسكة بيدها قلاس عصير وتتفرج.. وكالعادة منيرة آخر صرعه.. لابسه فستان فوشي.. وطالعه كنها أخت قمر موب أمها ..
هناء في عرس ولدها البست ثوب من الشك اليدوي المذهب الغالي.. والبست الشيله والبطولة .. وكحلت عيونها .. كان الجو وايد حلو .. والطقاقات والنقوط كان صج متعوب عليه ..
منيرة ـ ماتقومين ترقصين يالدانه ؟
دانه ـ ماقدر .. تعبانه شوي ..
منيرة ـ لايكون حامل ؟؟
دانه ـ لا .. تو الناس .. مأجل هالفكرة شوي ..
منيرة ـ عيل قومي ارقصي .. وشاللون اللي لابسته ؟؟ شنو ماعندج فلوس تشترين فستان راهي ؟؟
دانه ـ عندي .. بس أنا حبيت هالفستان ..
منيرة ـ ماعندج سالفة ..
حست دانه صج أن ماعندها سالفة .. لو شافها خالد بيزعل أنها لابسة هالفستان..
ركضت لقمر ..
قمر ـ هلا عمة .
دانه ـ يبتي فستانج الثاني ..
قمر ـ اييه يبته على الفاضي .. .. قلت أبدل .. بس الكوافيره حماره مارضت تضبل علشان تغير اللوك ..
دانه ـ خلاص .. عطيني اياه ألبسه .. شلونه؟
قمر ـ بتغطين علي يا عمتي .. لونه أحمر لون دم الغزال .. ماشي مع مكياجج .. بساعدج في لبسه ..
دخلت لغرفة التبديل وبدلت الفستان . اللي كان ملبيان أشرطة .. بس شكله صج راهي ..
قمر ـ نزلي شعرج ...
دانه ـ ........ اوكي نزليه ..
فتحت دانه شعرها .. وكان مرتب وايد .. وطلعت فله ..
ضبطت لها قمر شوي لمسات .. وطلعوا للناس .. اللي انبهروا بشكل دانه .. قمر كانت لابسه فستان كوكتيل فيروزي وايد راهي وحلو ..وقصير شوي من جدام .. والمكياج مطلعها حلوة وايد ..
منيرة ـ اييه .. جيبه .. على الأقل الناس تقول مرت ضاحي حلوة شوي ولو بثوب قمر ..
قمر ـ يمه عمتي ماشاءالله تهبل .. و هي اللي محليه الثوب موب الثوب محليها ..
كان الأحمر طالع صارخ بالنسبة لبشرتها الببضا ..ومخليها جنان .. دانه بينها وبين نفسها كانت تهدي نفسها .. وتحاول أنها ترقص .. علشان خالد وليلى.. وكانت فكرة غلط يوم البست اللون الأسود الساده ..
ارقصت خفيف مع قمر .. وشوي شوي رقصة تجر رقصة .. خصوصا أن معظم رفيجاتهم موجودات .. وكانوا يموتون على ليلى .. وناطرينها على نار .. وارقصوا بنات وايد ..
رن جوال الدانه .. كانت أم ليلى تقول لها أن ليلى وصلت .. طالعت دانه الساعة كانت عشر ونص ..
وعلى موسيقى هاديه
اخطي بخطوة غالية يالليل الهادي ..
اخطي بقلوب الناس وغلاهم لج وفرحهم ..
اخطي بحفظ ربي يا روعة أعيادي ..
يا أحلى عروس يا أجمل وأحلى وردهم ..
يحفظج ربي يالزين عن عين الحساد..
يحفظج يا غالية دوم بسلامة وسط قلبهم ..
ياليلى يالعذبة ياساكنة بالقلب والفؤاد ...
ربي يسعدج في ظل خالد بعيد عن عينهم .
كانت ليلى تدخل بهدوء وشكلها كان صج روعة فستانها كان وايد حلو كوكتيل مع شرايط على اليدين .. وكانت منزلة راسها شوي.. ومع الشعر.. كان دخولها صج رومنسي .. والورد اللي يحذفونه خزاتها جدامها .. استانست الدانه .. مهما كان اللي يخبيه بكره .. مالازم نخليه يسيطر على فرحتنا اليوم ..
كانت هناء صج مستانسة .. لان شكل ليلى كان وايد روعه ..
بعد ما اوصلت ليلى لكرسيها وارتاحت من بحلقة الحريم فيها .. ابتدت منافسة الرقص .. وكل البنات من بينهم قمر كانوا كله يباركون لليلى ويرقصون لها ..
طلعت دانه .. تبارك لليلى ..
ليلى ـ بغيت أصيح لما شفت مفاجئتج ..
دانه ـ محاولة فاشلة .. أتمنى تكون أعجبتج؟؟
ليلى ـ الشعر يجنن .. يجنن .. وكانت الموسيقى اللي معاه واللي يلقيه صج مسوين جو ..
دانه ـ هذا مشروع من زمان فكرت فيه .. أتمنى أعجبتج هديتي ..
ليلى ـ لا تمنين علي فيها .. بس خذي لاشريط وعطيه أمي تحطه بين أغراضي.. كانت أحلى هدية أهداني اياها حد .
دانه ـ عن الجذب .. موب كانت القلادة اللي اعطاج اياها خالد أحلى هدية ..
اكتبت دانه هالأبيات تهديها لليلى .. حبت تكون دخلتها غير .. شي يليق بها .. لقت وايد أشعار للزفات بسم ليلى .. بس حبتها تكون خاصة بليلى بس .. فألفت لها هالأبيات البسيطة . .. رقصت دانه مع البنات ..
وبعد ساعة وربع دخلوا الرياييل .. كانوا أهل ليلى وناصر وخالد وكل خوانه طلعوا أهل ليلى .. فصعدت دانه وسلمت على خالد .. وهي كاتمة دمعتها غصب ..كان ويهه شاحب شوي .. ماقدرت تضمه حيل ..
خالد ـ فضحتيني يالحمارة ..
دانه ـ خلودي .. لاتنسى شسويت يوم عرسي .
خالد ـ شكلج وايد حلو ..
حذفت دانه العباة .. وحطت الشيلة على كتوفها ورقصت مع الشباب عيال أخوانها ..
حسن ـ ماشاء الله يا دانه .. تطيحين القمر من السما ..
دانه ـ استح ..
حسن ـ أيووه يالأحمر ..
كان الوحيد اللي وقف مكتئب هو حمد .. راحت له الدانه ..وهمست في أذنه ..
))موب كل يوم يعرس خالد ..افرد هالويهه ((
ابتسم حمد .. لما رقصت دانه جنبه ..
وهمست مرة ثانية )) البنات كلهم يطالعونك ..يقووولون من هالشي الحليوه))
حمد ـ لا ..احذفيني من القائمة .. مافي زواج .
دانه ـ متأكد ؟؟
طلعوا الشباب .. وتم خالد مع زوجته يصورون .. صورت معاهم الدانه ..
قمر ـ شكنت تقولين لحمد ؟
دانه ماكان لها خلق لأسئلة قمر ـ قلت له متى تخطب قمر؟؟
عصبت قمر وراحت بعيد عن دانه ..
ما قدرت تمسح دموعها وهي تودع خالد وليلى اللي طيارتهم الفجر ..
لاول مرة تكسر خاطرها هناء .. المسكينه الفرحانه وهي ماتدري شالسالفة .. بس هذا كان أحسن الحلول ..بدل ما يعيش خالد هله في حيرة ووألم .خلى السالفة بكتمان .. علشان محد يشيل همه . وهناء وناصر رغم مساوؤهم .. بس عندهم أولادهم بالدنيا .. ومرة بغى ناصر يروح فيها علشان حادث صار لحمد ..طلع منه الأخير بسلامة .
****************************
رجعت الفجر .. وكانت صج في حالة هلاك من الصياح والبجي .. وصلتها منيرة وراحت ..
وخشمها وايد أحمر وعيونها بعد .. طلعت على طول للطابق الثاني ..
طلع من غرفة ..
ـ امم ريحة البخور غاوية ..
وقفت دانه وهي تحاول تمسك أنفاسها ..
ـ الله على الأحمر .. جنان .
حاولت دانه تغطي فستانها بعباتها .. وحست أن شعرها طلع من ربكتها فدخلته ..
ـ فيصل تبي شي ؟؟
فيصل ـ قلاس جاي ..
دانه ـ الخدامة يت معاي .. وهي تحت اطلب منها .. عن اذنك ..
ـ بسألج سؤال ..
دانه ـ نعم ؟
فيصل قرب منها وهي حاولت تبعد عنه ..
فيصل ـ شيعجبج في ضاحي ؟؟؟
ابعدت دانه أكثر ..
ـ ما أعتقد يخصك ..
فيصل ـ الأحمر يينن عليج .. طالعه ..
دانه ـ عن اذنك ..
كملت دانه طريجها لغرفتها واستغربت أن الباب مفتوح ..
وانصدمت لما لقت ضاحي واقف .. وشافت نظرات غضب مو طبيعيه في عيونه ..
دانه ـ ييت متى ؟؟
ضاحي ـ أكيد قبلج بوايد ..
صكرت دانه الباب وقطت العباة على الكرسي .. وفردت شعرها ودخلت غرفتها ولحقها ضاحي ..
ـ ولج عين ..
دانه ما ردت .. مسكت المشط ومشطت فيه شعرها ..
ضاحي ـ ردي علي .. شتسوين؟؟
دانه ـ ماتشوفني أمشط شعري ؟؟
عصب ضاحي عليها وحست دانه بعصبيته وقررت تتجاهله ...
لكنها تفاجئت بيد تمسك شعرها بقوة و.............
هزتها الصدمة لما شافت شعرها بين يدينه .. رفعت يدها تمسكه .. ماكان موجود..حذف شعرها على الأرض .. تناثر شعرها الطويل على الأرض .. أخرستها الصدمة .. ودموعها جرت على خدودها بدون رادع ..
حاولت تنطق .. بس ماقدرت ..
ضاحي ـ ايش كنتي تسوين ويا فيصل ؟؟؟
دانه نطقت بعد جهد وهي ترجف ..
ـ طلب مني جاي .. بس .. وقلت ...له ..الخدامه تحت ..
نزلت على ركبها ودموعها تساقط على الأرض تجمع شعرها الي نثره في كل مكان ..
وكل ذره في جسمها مجروحه ومصدومة .. حذف المقص الكبير الحديد على الأرض .. بقوة .. وصرخ فيها ـ ما تطلعين من غرفتج سمعتي ؟؟
وأخذ المفتاح وطلع وقفل الباب .. دانه ماقدرت إلا تبجي .. وتبجي ..
دقايق إلا سمعت صراخ بره .. قامت لين عند الباب .. وسمعت ..
تركي ـ ليش تصارخ جي؟
ضاحي ـ قلت لك شتبي في الدانه ؟؟
تركي ـ مو أنا أبيها .. يبيها حمد ..
ضاحي ـ حمد ؟؟ ومنو هذا بعد ؟؟ اكملت.. على الكل ..فيصل وأنت وحمد .. متزوج مارلين مونرو.. وأنا ما أدري ..
ارتجفت دانه من كلام ضاحي .. وحست بخناجر تطعنها ..
صرخ تركي ـ هييه.. شالكلام الماصخ ؟؟ حمد ولد أخوها يبي يكلمها تحت.. شفيك موب صاحي ؟؟ ودانه أكبر من هالكلام السخيف اللي تقوله .. بقوله أنها نايمه ..
طلت دانه من فتحة الباب.. وشافت تركي يطلع وهو يدز كرسيه غصب.. انهارت .. خلاص .. دموعها اليوم مابتوقف.. العنت اللحظة اللي تزوجت فيها .. والعنت خالد ونايف وفيصل وناصر . وحظها الخايس ومنيرة وهناء.. دقايق .. وتسمع صوت ربكه بره وتدافع ..
ردت تطل من الفتحة .. كان ضاحي وباين أنه حاكر حد يكلمه بعصبية ..
حطت اذونها على الباب تتسمع ..
ـ كل الي طلبته منها قلاس جاي ..
ضاحي ـ سمعت كل كلامك الماصخ .. لاتنكر ..
فيصل ـ هدني الحين والا أفضحك عدل جدام مرتك وأطلع كل المتخبي وبلاويك..
ضاحي ـ أنت تهددني ؟؟ أنت ؟؟ من قال لك أني خايف منك ؟؟ ومن قال أنك هزيت شعرة مني ؟؟ اسمع يا فيصل.. كلمة ورد غطاها .. ابعد عن مرتي .. سمعت ؟؟ وانقل غرفتك الطابق اللي تحت ولاعاد توطوط هنا مرة ثانية ..
حذف فيصل بره وصك الباب بقوة في ويهه.. وراح للغرفة مالته ..طالعت دانه شعرها . اللي تناثر على الأرض .. وظلت تجمعه وترتبه .. ودموعها مع كل شعره تمسكها تنزل.. لفت الشعر بحجاب.. وحطته في درج وحطت راسها على المخده .. اللي غرقت بدموع القهر والظلم ..
الحلقة الخامسه عشر
ما انتهت هالليله .. دانه ماقدرت انها تظل في هالبيت اليوم ..
اتصلت في حمد ..
حمد ـ هلا عمتي .. قالوا لي نايمه ..
دانه ـ حمد .. تعال وخذني من هنا بسرعه ..
وبدت تبجي بقوة ..
حمد ـ دانه شفيج .؟؟؟ دانه .. حد مد يده عليج ؟؟
دانه ـ تعال حمد .. وخل تركي يوصلك لغرفتي بهدوء بدون ضجة ..
صكت التلفون وهي تصيح .. قامت وحطت ملابسها في شنطه كبيرة .
مستحيل تم عنده بعد اليوم مستحيل ..
كانت الساعه خمس ونص الصبح ..الحين الكل نايم عدا تركي اللي يسهر على النت طوال الليل ..
ردت وطالعت شعرها في المنظرة ..قصه كله مره وحده ماخلى شي منه ...شالوحشيه؟؟ ليش ؟؟ شسويت له ؟؟
البست عباتها ...وتمت عند باب الغرفة المقفول عليها ..هالمرة هي اللي بتحط له نوته ..هي اللي بتختفي وتتركه ..مسكت ورقه وقلم وبصابع ترتجف كتبت ..
غيابك هجرك كذبك وخداعك.... خنجر طعن قلبي لكن اخونك؟؟
لالا يالغالي لاتتهمني بطباعك....أنا بنت أصل وأكبر من ظنونك
نطرت دانه لين جوالها دق ...
حمد ـ عمتي كلمت تركي ودخلت البيت ..
دانه ـ حمد اكيد ضاحي نسى باب قسمي مفتوح ادخل وتلاقي في العلبه اللي على الطاوله سبير المفاتيح افتح الغرفة اللي على اليمين بهدوء بدون ضجة الله يخليك...
دقايق وفتح الباب حمد وهو منصدم ..
ـ ليش قفل الباب عليج؟؟
دانه ـ موب وقته ..خل نطلع من هنا بسرعه ..
كانت دانه لابسه شيلتها دخل حمد يشيل الشنطه ..
طلعت لتركي اللي كان عند الباب ..ابتسمت ..
ـ تركش مشكور ..لاتقول لحد انك شفتني طالعه..
تركي ـ ما بترجعين؟؟
دانه ـ تركي .. اللي صار اليوم اكبر من طاقتي ...مع السلامة .
نزلت دانه تحت لسيارة حمد ..اللي بعد دقايق..
ـ ليش ويهج جي ؟؟ ليش تصيحين ؟؟
دانه ـ مافي شي ..
حمدـ عيل ليش متصله هالحزه فيني؟؟
دانه ـ ابيك توصلني بيت خالي ..وارجوك لاتقول لحد انك خذتني زين؟؟
تمت ساكته طول الطريق...
حمد ـ زين يمكن نايمين..
دانه ـ خالي الصبح يصحى يروح المسيد ,,,
حمد ـ ما بتقولين لي شصار ؟؟
ماتكلمت الدانه.. الحمدالله ان خالد مسافر .. وان مافي في البيت الا عبير وخالها وزوجه خالها ام خالد اللي كانت طيبه وايد معاها .
نزلت من السيارة ونزل حمد ونزل لها الشنطه ..
دانه ـ خلها في الحوش .. وروح الله معاك
كان خالها واقف عند الباب توه راجع من المسيد .. سلم عليه حمد وطلع .. سلمت عليه الدانه ..
ابو خالد ـ دانه ؟؟ شيابج هالحزه ؟؟ وليش يايبه شنطتج معاج ؟
ماقدرت دانه تكتم دموعها .. حضنها خالها .. وهو حاس انها انظلمت.. يعرف الدانه مربيها..وما تنهار الا للشديد القوي ..
دخلها للبيت .. وخذها لغرفة العنود .. وصك الباب .. وتم حاضنها ..
حست دانه انها لقت الحضن اللي تستند عليه .. حست انها هنا بامان مابعده أمان ...
******************
بدور ـ الشقة وايد صغيره ..
خالد ـ صغيره ؟ فيها غرفتين وحمام وصاله صغيره وفي موقف سياره وديكورها وايد حلو ..
بدور ـ تدري غرفتي انا وقمر مع بعض اكبر منها ..
خالد ـ يايبه بيتكم الكبير لهالشقة الصغيره ؟ يالله على قدنا .. بس مالج شغل في جيراننا تراهم ناس يحبون العزله ..
بدور ـ اكيد في بينهم وحده او اثنين عرب ..
خالد ـ في البيت اللي تحت من باكستان .. واللي في الطابق اللي فوق من تونس ..
بدور ـ مافي خليجين ؟؟
خالد ـ فيه في المبنى اللي جنبنا . من الامارات وفي من السعوديه .. بس مثلي طلاب .. عزاب .. يعني خلج بعيده ..
بدور ـ الاثاث مب شي ..
خالد ـ بالعكس .. عاجبني ..
بدور ـ ما احب اللون العنابي ..
خالد ـ يمشي حاله ..
بدور ـ يعني هذا معتقلي الخاص ؟؟
خالد ـ اسمه بيتنا.. وهذا أول بيت بنعيش فيه .. بلا تذمر وزعل .. المسكين هالبواب ..ابتلش في شنطج الكثيره ..
بدور ـ وين بنحط الخدامه ؟؟
خالد ـ الخدامه هنا ماتسكن معانا .. تيي تنظف البيت وتسوي الاكل وتروح أخر النهار لبيتها ..
بدور ـ شأصلها؟؟
خالد ـ مكسيكيه .. فكيني من أسئلتج ..
بدور ـ حلوة ؟؟
خالد ـ وايد . بتشوفينها بعد شوي العصر ..
بدور ـ ياويلك ان كانت حلوة ..
خالد تنهد ودخل الغرف..غرفه منهم مكتب والغرفه الثانية غرفه النوم .. وفي الصاله كان طقم الجلوس مع تلفزيون كبير .. والمطبخ صغير .. بس بدور مابتدخله فماكان له أي داعي . ..
حط ملابسه في خزانته .. وهو يطالع شنط البدور .. وين بتحط ثيابها ؟؟ الغرفه صغيره والخزانه عباره عن غرفه صغيره مترين في متر .. فيها منظرة كبيره على الباب ..
دخلت ..
خالد ـ بتكفي الغرفة لثيابج ؟؟
بدور ـ في غرفتين خزاين .. لاتحط ملابسك هنا حطها في غرفة المكتب .
خالد ـ المكتب فيه غرفه ثياب؟
دانه ـ اييه .. المفروض غرفتين نوم بس انت قلبته مكتب .. ودام المكتب بيكون لك خذ الخزانه ..
نقل خالد ملابسه للخزانه الثانية اللي كانت اصغر من لاولى ...وهو يرتب ملابسه مرته بدور ......
بدور ـ خالد في حد يبيك على الباب ..
خالد ـ طلعتي له جيه ؟؟
كانت البدور لابسه قميص وبنطلون بس من غير حجاب ..
بدور ـ عادي .. حنا في أمريكا .
عصب خالد ـ مره ثانية تلبسين حجابج يامدام ..وماتعدي ريلج هالشقة من غير حجاب .. سمعتي ؟؟
بدور ـ لاتصارخ علي جي .. أنا أبوي اللي هو أبوي عمره ماصرخ علي ..
دخلت للغرفة معصبة .. طلع خالد للي اللي عند الباب .. وكان ريال ياي يركب التلفون.. وحمدالله خالد انه أمريكي .. ومافهم الصراخ اللي كان ..
طالع الغرفة اللي فيها بدور .. نطر العامل لين خلص توصيلات وعطاه رقم التلفون .. وطلع .. دخل خالد وهو متوقع يلاقي البدور تصيح ..
لكنه انصدم لقاها ترتب ملابسها ولا على ملامح ويهها أي تعبير زعل أو غضب .. أأو حتى ندم ..
( الظاهر بدور قوية .. ... أكره هاللحظات .. ماأعرف شقول .. )
وتم ساكت .. واقف عند الباب مايعرف شيقول .. على الاقل لو كانت تصيح كان هون عليها وفهمها الموضوع ببساطه.. لكنها يالسه كن ماشي صاير .. كرامته ماتسمح له يتكلم حرف .. لانها صج صج خلته يعصب ..
بدور ـ خالد بليز شل الشنط للمخزن ..
طبعا هالتصرف خل خالد يبهت .. بس ماقدر الا يشيل الشنط وينسى أن شي صار .. مثل ماتبي بدور .. وخلال دقايق تكلموا عادي كأنه ماشي صار .. ارتاح خالد شوي والتوتر اللي كان بينهم راح .. بس ياترى هل بتنفذ أوامره وتلتزم بالحجاب ؟؟
********************
فتحت عيونها .. طالعة الساعه .. كانت وحده ونص .. تذكرت كل اللي صار وانهارت بالصياح ..
البست شيلتها وراحت الحمام اللي في الممر تغسل ويهها ..شافتها عبير وعرفت انها صاحت اركضت واحضنتها حيل..
لان الدانه غالية عليها وااايد ....وايد ..
عبير ـ ليش ويهج جي .. انصدمت لمنا قال لي ابوي انج هنا من الفير ..
دانه ـ بس خليني اغسل ويهي واتيدد .. وبعدين بقولج
**
بعد ماصلت يلست على السرير ويابت لها عبير ريوق ..
عبير ـ يلا سمي ..
الدانه ـ مالي نفس ..
عبير ـ زين قطي الشيله الدنيا حر ..
دانه ـ خليني لابستها ..
عبير قامت بنية طيبه ونزعت شيليتها .. ووقفت مبهوته .. دانه صاحت..حطت يدها على شعرها تبي تغطيه ..
عبير ـ أمس في الليل ماكان فيه شي ؟؟؟
ماقدرت دانه تقول شصار ..ماقدرت . ..لسبب في نفسها ماحبت انها تقول ..
دانه ـ احترق شعري امس ....وهذا اللي قدرت انقذه ...
عبير ـ لا !!
حضنتها عبير بقوة ...وهي تشهق ..
بعد لحظات من الدموع ...
عبير ـ خلاص هدي ..الحمدالله ماتشوهتي ...الحمدالله النار ماوصلت لراسج كله ..الحمدالله ..ماقلتي لي شلون؟
دانه ـ شمعه ...اعتقد ..ما اذكر ..
العزاء الوحيد اللي بررت فيه دانه كذبها هو انها صج حرقته النار ..بس كانت نار غيرة ضاحي ..
عبير ـ ياعمري ...كلي ..كلي..
دانه ـ مالي نفس ...
دخل خالها ..وانصدم بقصة شعرها ..
بو خالد ـ ليش قصيتي شعرج جي ؟
عبير ـ يبه الدانه بغت تحترق ؟؟بس الحمدالله يا في شعرها النار ..
ماتدري الدانه شلون مرت اللحظات السخيفة اللي صج خالها انصدم فيها واختلقت لها قصة عن خلاف بسيط بينها وبين ضاحي .. وحست أنها وصخه .. ملوثه كذابه .. حقيرة أنها تكذب على ناس تحبهم ..
طلعوا عنها .. والعصر ياتها قمر ..
قمر ـ ياعمري .. ياعمري .. اتصلت فيني عبير ويبت مدام زاكو اللي تقص شعري خصوصا.. هااااااااااااااااااااااااااااااااااااااااااه.. لا .. حرام .. ماباقي شي فيه .. لحظة .
نزلت بسرعه ويابت الكوافيرة اللبنانية مدام زاكو ..
قمر ـ أرجوج أنقذي اللي تقدرين تنقذينه .. ماتدرين شقد شعرها كان يهبل ..
استسلمت دانه لمدام زاكو اللي كانت كوافيره لبقة في الكلام ..
بعد ربع ساعه دخلت ام خالد بعد مادرت بالسالفة من عبير .. وواستها بكلمتين .
ـ يا بنتي عيون الناس ماترحم .. أمس كنتي بأحلى طلة لج.. والحريم انهبلوا على شعرج يوم لفحتي به..
تنهدت الدانه.. ياليتها كانت على سالفة الشعر بس ..
دانه ـ عبير اوعديني انت وقمر .. وأنتي ياخالتي ان ماتقولون لحدج اللي صار . أنا بخلي السالفة كأني أنا قصيته متعمده ..
ام خالد ـ اييه يابنتي . أحسن لج والا كل الحريم بيتكلمون عنج .بس الحمدالله ماصار شي لج الحمدالله ..
حست دانه أن ام خالد صج مهتمة لها .. وهي مهتمة لها .. تقريبا
دانه تربت بين بنات ام خالد لما كانت أمها في المستشفى ,,
انتبهت أن مدام زاكو انتهت ..
قمر ـ بالضبط عالموضه ..
دانه ـ صرت كني صبي ..
مدام زاكو ـ بالعكس .. رقبتك مخليتيك ولا ايزابيلا روسيليني ..
دانه ـ ومنو هاذي بعد ؟؟
قمر ـ ايزابيلا روسيليني مرة وحده ؟ ؟؟
دانه ـ من ايزابيلا روسيلايني ..
قمر ـ عارضة أزياء كانت في عمرنا سنة 67.. ولما تشوفينها هالحين .. تحسبين أن حن أكبر منها..
دانه ـ وبئس التشبيه ..
عبير ـ قصتج صج حلوة .. ومثل ماقالت مدام زاكو .. وايد مطلعتج انوثه ..
دانه اكتمت عبراتها .... وما علقت .. مر باقي اليوم هادي .. لكن اللي صج كانت خايفه منه دانه هو انها تفتح جوالها اللي كانت مقفلته ..
تعبت .. خلاص .. مابترجع لهذاك البيت .. ما بترجع .. يا خالها وطق الباب ..
ـ دانه ..
دانه ـ تفضل خالي ..
دخل خالها اللي له مكانه خاصه في قلبها .. لانه من ريحة المرحومة ..
بوخالد كان حنون ... خصوصا على هاليتيمة ..
جلس بقربها .. وبهدوء عجيب ..
ـ دانه .. شصار بينكم ؟؟
تنهدت دانه .. ما قدرت تكبح هالدموع اللي طلعت منها مكتومة بدون صوت ..
بو خالد ـ يا لهنا ضاحي.. بس أنا صرفته.. لان كلامه ماعجبني.. دخل يهاوش ليش تطلعين من البيت من دون اذنه هالخرابيط ..
دانه تحاول تمسك نفسها .. بس لمن بتشتكي ؟؟ لمن بتشتكي ؟؟ كانت تشتكي ليلى ... وليلى خلاص دخلت في عالم من العذاب والألم .. خصوصا أن خالد ازداد تعبه ..
دانه ـ خالي .. خالي أنا مالي حد .. زوجوني به غصب .. وهو حتى موب طايقني!!
انهارت دانه بالصياح في حضن خالها وهي خلاص حست أنها انتهت ..
حاول بو خالد بيد ترتجف أنه يهديها ..
بو خالد ـ اهدي يالدانه .. اهدي .. اهدي يا بوج .. ماعاش من يغصبج على شي ..
دانه ـ ناصر زوجني بضاحي بدون ما ادري ولا اشوفه .. والريال يسافر ويغيب .. ولا كأني موجوده ..تخيل ماشفته الا ثلاث ولا اربع مرات ؟؟ واليوم لما رجعت من العرس الفير .. اتهمني يا خالي .. اتهمني في أخلاقي تصدق يا خالي ؟؟ أنا الدانه بنت حسن يشكك في أخلاقي وكرامتي ؟؟؟؟؟ أنا تربيتك وتربية أختك ؟؟
انهارت الدانه زياده .. وخالها يحاول يهديها ..
بو خالد ـ شلون ؟؟؟ الخايس الحقير .. أنا أراويه يخسي يقول عنج جي ..
دانه ـ لا يا خالي.. ارجوك .. ما أبي الناس تقول عني قليلة أصل .. أدري أن المفروض اسرارنا ماتطلع لحد.. بس يا خالي ماقدرت.. ماعندي أم أشكي لها ولا حد قريب مني وأكبر مني يفهمني .. وأنا ما أبي ضجة ولا شماتة الناس ..
بو خالد ـ شقصدج يالدانه ؟؟
دانه ـ بس أبي منك يا خالي تخليني تحت ظلك لين تعدل الأمور ..
بو خالد ـ شوفي يالدانه.. هالبيت بيتج .. ولا لج طلعة منه الا بخاطرج .. ومن مايكون ما بيصير شي الا برضاج .. وهالضاحي مايقرب لج بعد اليوم .. الا بعد مايرد اعتبارج ..
******************************
يحاول ضاحي طوال يومين مروا انه يكلم الدانه اللي طنشته وما عطته ويهه .. والتزمت في بيت خالها يات قمر بمطاريش وايد من ضاحي لكنت دانه رفضت حتى تشوفهم أو تسمعهم.. لين يا حمد ..
حمد ـ عمتي الحقيني ..
دانه ـ وناسه تقول عمتي ..
حمد ـ الحقيني أنا أكرهها وما أواطنها وما أبي أسمع اسمها حتى ..
مافهمت دانه شيقصد لان في اللحظة نفسها دخلت قمر وهي تصيح ..
ـ أكرهه أكرهه .. ما أبيه ..
تفاجئت الدانه وتموا الكل منصدمين من وجودهم ..
حمد ـ أنا اللي ما أبيج خل أمج توخر عن أمي لاتحط براسها أفكار شينه ..
قمر ـ يعني انا اللي ميته عليك ؟؟ والله مصدق عمرك ولو غصبوني بذبح عمري ولا ارضى ..
حمد ــ هييييييييييييييييييييييه انتي يالسبال يالعنز مصدقة روحج وايد أنا موب ميت عليج ويا ويهج ..
افهمت دانه السالفة وهي تقضب يد حمد عن قمر في صالة بو خالد..والعايلة كلها كانت رايحة للعنود في المستشفى بعد ماربت ويابت ولد ..
ضحكت الدانه من قلبها لاول مرة من يومين وقالت بابتسامة شقاقية ـ والله حسيت ..
حمد ـ انتي ليش مستانسة فكيني من بنت اخوج هالعنز ..
قمر ـ عنز ما غيرك يالخبوول .. يالمتخلف ..
دانه ـ قمر عيب ,,
حمد ـ انت والله مصدقة روحج.. ولا اسمج بس في وحده اسمها قمر الزمان ؟؟؟ الظاهر ابوج يوم انولدت كان متأثر بكتاب الف ليه وليله ولا علي بابا ..
الدانه ماقدرت الا انها تضحك بقوة .. وهي تبعدهم عن بعض ..
قمر ـ اصلا انا غيرت اسمي لقمر بس من ست سنوات .. وما اسمح لك تتطنز علي يالمتخلف ..
الدانه ـ صج قمر غيرتيه ؟؟؟
قمر ـ اييه .. علشان جييه بعدت عن بدور علشان ماتعرف وتسبب لي فضيحه ..
حمد ـ متأكده بس غيرتي اسمج ؟؟ ماغيرتي خشمج ولا براطمج ولا ..
قمر ـ كله طبيعي الحمدالله وما اسمح لك ..
حمد ـ تسمحين ولا ما تسمحين موب انتي اللي تقررين ..
قمر ـ أنا اللي اقرر وقراري اني ما اتزوج امثالك ..ناس متخلفة
حمد عصب من نظرتها واحتقارها له .. ابتعد عن الدانه بعصبية ..
ـ زين يا قمر ابوج .. ان ماذليتج ماكون حمد بن ناصر ...بس عقب ما ارجع من السفر ..
دانه ـ متى تسافر ؟؟
حمد ــ الليلة ..
دانه ـ توصل بالسلامة ياعمري .. أرجوك حط بالك على خوك . ارجوك .. اتصل فيني كل يوم .. ارجوك ..ارجوك ..
حمد ـ لاتوصين يالدانه ..مع السلامة .لج انتي موب لهالدلوعه السبال ..
حضنته دانه بقوة ....
دانه ـ بأمان الله ..
حمد ـ مع السلامة ......
طلع حمد وقمر مستغربة .
قمر ـ شصار ؟؟
دانه ـ شصار ؟؟ شاللي شصار ؟؟
قمر ـ وين مسافر لا ومن اخوه .. وشالسالفة .؟؟
دانه اضحكت .. ــ بتتزوجين من حمد ونااااااااااااسه ... والله انكم لايقين لبعض وايد ..
قمر وهي مشمئزة ـ وأنتي ليش مستانسة جيه ؟؟
دانه ـ أبد .. تعالي قولي لي شصار بالضبط ؟
قمر ـ شصار ؟؟ ياتني امي وقالت لي ان ابوي وعمي اتفقوا على الزواج.. خصوصا بعد زواج خالد وسفره أمس .. قرروا امس بوسط الناس والعرس انهم يزوجوني لولدهم هذا ..
دانه.ـ اسمه حمد. وهذا تاج راسج سمعتي ؟؟
قمر ـ الله يستر ما أبي أتزوجه ما أحبه متخلف وايد متشدد كاره عيشته دايم ..
دانه ـ امشي فوق معاي ..
قمر ـ خالي اتصل فيني ..
دانه ـ قمر ولا كلمة ولاكلمة ..
قمر ـ دانه ... شصاير بينكم ؟؟
دانه ــ ولاشي .. بس أتغلى ..
***********
وانتهى شهر العسل .. (اسبوعين العسل ) مر اسبوع ..
بدور تدور في البيت ملانه ... ماتلمس شي .. الخدامة المكسيكية هي اللي تسوي كل شي ..
بدور ـ افففففف .. افففففففففففففففففففففف .... اوووف ... ملل.. لالا .. بارارب..ملل ..
خالد كان فاتح باب مكتبه ويسمع تأففها الواضح لكنه طنش وحط راسه في الاوراق اللي جدامة ..
بدور ـ اووووووووووووف .. ملل ..
صارخ خالد من داخل المكتب (عاد مو من كبر الشقة )
ــ طالعي التنلفزيون وفكيني من تأففج ابي أركز ..
مسكت بدور الريموت كنترول وبدت تقلب في القنوات ..
خالد ـ الصوت عالي ..
بدور بلؤم ـ من كبر الشقة مايوصل .. اووووف ..
خاد ـ بدور شتبين ؟؟
طلع من المكتب وكانت يالسه بملل وحذفت الريموت كنترول بعصبية ..
خالد ـ نعم ..
بدور ـ ملل .. أنت الصبح كله في الجامعه والمستشفى ولما ترجع تحط راسك بين هالكتب .. موب هالفكرة اللي في راسي عن امريكا ..
خالد ـ شوفي يالشيخة .. مو ذنبي انج ما تبين تطبخين ولاتبين تشغلين وقتج بالدراسة ولا مطالعة التلفزيون ..
بدور ـ هذي أمريكا ..يعني لازم نتمشى كل اليوم ..
خالد ـ شوفي بدور لاتغثيني .. طلعه مافي ليوم الأحد سمعتي ؟؟
بدور ـ خالد حرام عليك أنا هنا بروحي لين ترجع الساعة ست فالليل من دوامك .. بروحي طول اليوم ملل .. وبعدين ترجع للاوراق والكتب .. كأني موب موجوده ..
خالد ـ خلاص .. قومي بنطلع اليوم نتعشى برا ..
بدور ـ اييه حبيبي .. جييه ..
قامت بدور تلبس .. تأفف خالد هالمرة .. هذي المرة الرابعة هالأسبوع اللي تجبره يطلع معاها وهو صج مشغول..
بدور ـ وين نروح ؟؟
خالد ـ أي مكان ..
بدور ـ حبيبي لايكون مشغول ولا زعلان ؟؟
خالد (كل مرة نفس السؤال ونفس نظرة التمسكن ) ـ لا .. يلا خلصي ..
بدور ـ هالحين أخلص ..
خالد ( طبعا المعنى بعد ساعه .. خليني ارجع لكتبي لين تجهز ))
بعد ثلث ساعه ـ يلا حبيبي ؟؟
خالد ـ اييه ...
بدور ـ معليش كنت لازم آخذ شور ..
خالد ـ يلا .. ماريا راحت ؟
بدورـ هييه صرفتها من زمان ..
كانت البدور لابسة بلوزة وردي مع أبيض .. مع بنطلون أسود وجاكيت أسود طويل وبوت أبيض ....وحزام أبيض عليه cd علامة كريستان ديور ..
خالد ـ لابسه هالجاكيت من أرماني وهالبدلة من كريستان ديور .. وين تبين تروحين مع هالكشخة ؟؟
بدور ـ وناسه ..انت فاهمني عدل.. تعرف عني كل شي بس الجاكيت من شانيل موب ارماني جاكيتك انت وبدلتك انت من ارماني .. أبي أروح لمطعم فخم فيه رسبيشن ..
خالد ـ واحنا شدخلنا في حفلات الناس ؟؟
بدور ـ نتفرج ..
خالد ـ لاء .. بآخذج لمطعم هادي نتعشى وبعدين نروح نشوف فيلم بعدين نرجع ننطم .. عندي الصبح أشياء وايد .
بدور ـ حرام عليك خل نشوف الناس ..
خالد ـ كيفج غير هالجدول مافي .. تبين ولا اترجع لدروسي ؟؟
بدور ـ موافقة ..
خالد ـ بنروح المولات .. بنتمشى ..
بدور ـ ايه جي ..
************************
عبير ـ ها .. من شفتي .؟؟
دانه ـ الشلة من غيرهم رفيجاتنا من الثانوية الغرور ووساره ونوير وشمة.
عبير ـ وناسه الظاهر ..
دانه ـ أنا ما أحبهم .. بس الغرور حبوبة ..
عبير ـ امم .. متى بتفتحين جوالج ؟؟
دانه مقفلة جوالها من اسبوع .. طالعت عبير اللي فهمت نظراتها ..
دانه ـ ما أدري .. قمر أمس ياتني معصبة تقول ان خالها يبا يكلمني .. بس أنا طنش تعش تنتعش ..
عبير ـ زين يدري انج تروحين الجامعة ؟؟
دانه ـ لا .. خل يحترق .. ماقلت له ..
عبير ـ المسكين .. منيرة يات الصبح وانتي في الجامعة .. ودخلت غرفة بنتها البدور وحطت فيها اغراضها . شكلها ما تدري انج هنا..
دانه ـ اكره هالمنيرة بجد.. وآخر شي أبيه انها تدري اني تخانقت مع ضاحي .. بتدخل وبتسوي لي مشاكل ..
عبير ـ قمر ما صارت تيي ليش ؟؟
دانه ـ لانها دخلت الجامعة .. نسيتي ؟؟ صرت أشوفها هناك وندور مع بعض أغلب الوقت ..
عبير ـ أي تخصص ادخلت ؟؟
دانه ـ دخلت كلية العلوم .. بتدرس بيولوجي .. عاجبها ..بواسطة بسيطة تتسهل الامور عليها .. بس خل يمر التأسيسي على خير ..
***********
دخلت الكافتيريا وهي تعبانه بالمرة .. الساعة ووحده الظهر .. والمحاضرات من الصبح .. .
الغرور ـ دانه دانه دندن ..
الدانه ـ هلا ..
التفت للغرور اللي كانت عند باب الكافتيريا ..
الغرور ـ دانه .. أبي تلفونج .. تلفوني نسيته في البيت اليوم .. مع نص أغراضي ..
ترددت الدانه .. طلعت التلفون اللي حطته في شنطتها ..
دانه ـ تخيلي قافلته من اسبوع ؟؟
الغرور ــ في رصيد ؟؟
دانه ـ أنا خط موب كرت هلا ..
الغرور ـ محتاجة أكلم أمي تيب لي أغراضي وهي موب في البيت .لحظة ليش قافلته اسبوع ؟؟
دانه ـ بس جي ..
فتحت الدانه الجوال .. وثواني انهالت المسجات من كل مكان .. ولاعشرين مسج ..
دانه ـ سوري .. خذي ..
الغرور ـ مابتفحين مسجاتج ؟؟
دانه ـ لاء .. ما بفتحها ..
خذت الغرور الجوال وكلمت امها .. ورجعت الجوال للدانه بعد ما خلصت ..
ـ يلا نروح نآكل ؟؟
دانه ـ يلا ..
قفلت جوالها ورجعته لشنطتها ..
ـ بروح أسحب فلوس البوك فاضي ..
غرور ـ شتبين أييب لج ؟؟
دانه ـ أنا بعد و بشتري ..
رصيد دانه عود .. موب شوي .. فيه ميتين وخمسة وثلاثين ألف .. فيه نصيبها من ورث أبوها و بيت أمها .. سحبت ألفين ريال .. وانصدمت كم بقى ..
((ميتين وأربعين ألف ؟؟ ))
طلعت آخر ايصال في بوكها وكان في ميتين وخمسة وثلاثين.. من حط هالمبلغ في حسابها ؟؟ عشرة ألاف ريال ؟
فتحت جوالها .. واتصلت في نايف ..
نايف ـ هلا دانه ..
دانه ـ شخبارك يا نايف ؟؟
نايف ــ الحمدالله .
دانه ـ نايف في بحسابي عشرة آلاف زياده .. تعرف شي عنها ؟؟
نايف ـ اييه .. عطاني ضاحي امس هالمبلغ وطلب احطك في حسابج ..
دانه ـ ليش ؟؟
نايف ـ ما أدري .. ريلج اسأليه ؟؟ وينه هو ؟؟ أبي أسأله عن شغله .
دانه ـ أنا في الجامعة هالحين ..
نايف ـ ااييه .. شخبارج مع الجامعة ؟؟ قمر عاقده حياتها من هالجامعة ..
دانه ـ صراحه .. تعب من أول أسبوعين تعب ..
نايف ـ اييه شدي حيلج ..
دانه ـ انشاء الله .. تآمر على شي أخوي ؟؟
نايف ـ لا .. بس يمكن أمرج بكره ..
دانه ـ أنا أمرك .. اليوم .. وأشوف ام ضاحي بالمرة ..
نايف ـ الظاهر قمر ماقالت لج انها سافرت من بعد عرس خالد ..
دانه ـ لاء ماقالت .. فشيلة ما مريتها ..
نايف ـ شوفي دانه يبوني هالحين .. أتركج في امان الله ..
دانه ـ مع السلامة ..
حست دانه بتوتر .. ليش هالمبلغ حطه ضاحي ؟ وشقصده ؟ فتحت هالمسجات وقرأتها .. نصها كانت من صديقاتها .. وجزء منها من حسن وسلمان .. ومسجين بس كانو من ضاحي !!!
المسج الأول (( ارجعي البيت ))
المسج الثاني (( أبي أكلمج ))
حست بخنقة الدانه .. وأن كرامتها ما بتتحمل .. .. ولا كأنه شي صار ..
راحت للغرور تمت معاها تتكلم .. وانسدت نفسها عن الأكل ...
(( موب المفروض أنه يعتذر لي ؟ هو غلط بحقي واتهمني .. ))
الغرور ـ دانه اللي مآخذ عقلج يتهنى به ..
الدانه ـ محد .. ما شفتي قمر ؟
الغرور ـ بلى شفتها في مبنى العلوم .. كانت مع شمة ..
الدانه ـ زين ..
الغرور ـ ليش ماتآكلين ؟؟
دانه ـ لا .. بس موب جوعانه .. بروح أييب لي عصير .. بس ..
الغرور ـ شفيج مو على بعضج ؟؟
دانه ـ أبي أكلم ليلى .. وشايله همها ما كلمتني من سافرت وأنا ماعندي رقم لها ..
رن جوال الدانه وفزت مع الرنة ..
غرور ـ اسم الله عليج .. شاللي نززج ؟
دانه ـ لا .. ولاشي كنت .. ما ادري ..
طالعت الرقم كان حسن ..
دانه ـ هلا حسونه ...
حسن ـ ومرض .. وينج يالحمارة ما أعرف لج طريق .
دانه ـ أنا هنا ..
حسن ـ ليش قافلة جوالج ؟؟؟؟ وتلفون الغرفة ما تردين عليه ليه ؟؟
دانه ـ زين .. رديت هالحين شتبي ؟؟
حسن ـ وين أنتي ؟؟
دانه ـ في كافتيريا الجامعة .. ما اقدر اكلمك هالحين بس البنات يشوفوني اكلم واحد سيده يحطون اشاعات دسمة فاختصر ..
حسن ـ أنا في الجامعة .. أمرج هالحين نطلع نتغدى ؟؟
دانه ـ أنا خلصت محاضراتي اليوم بس كنت بروح لقمر .. لبيتهم ..
حسن - أنا بحذفج هناك بعدين .. بطلع الحين وأدخل لجامعتكم ..
دانه ـ بس انته ما عندك تصريح ..
حسن ـ ماعليج .
طالعت دانه الغرور .. ـ ولد اخوي الخبل .. يبي يمرني ..
الغرور ـ بتروحين معاه جي ؟؟ ويهج خالي من أي زينه ..
دانه ـ اييه .. لسبيبين .. حسون حمار والسبب الثاني موب حاطه في شنطتي أي مكياج ..
الغرور ـ بتروحين هالحين ؟
دانه ـ اييه ..
اتصلت دانه في قمر .
قمر ـ دانه ..
دانه ـ شوفي قمر بروح الحين وبمركم العصاري ..
قمر ـ اوكي انا عندي محاضرة بعدين ارجع البيت ..
دانه ـ باي ..